“ჩვენ, ვაიმარის სამკუთხედის საგარეო საქმეთა მინისტრები, ვწუხვართ საქართველოს პარლამენტის მიერ 4 მარტს უცხოური დაფინანსებისა და პოლიტიკური საქმიანობის შესახებ ახალი კანონების მიღების გამო, რაც აჩვენებს საქართველოს ხელისუფლების მიერ სამოქალაქო საზოგადოების მიმართ სულ უფრო რეპრესიულ მიდგომას.
ჩვენ სრულად ვეთანხმებით საგარეო საქმეთა და უსაფრთხოების პოლიტიკის საკითხებში კავშირის უმაღლესი წარმომადგენლის 2026 წლის 6 მარტის განცხადებას. ახალი ცვლილებები უპრეცედენტო დონემდე აფართოებს სახელმწიფო კონტროლს პოლიტიკურ და საზოგადოებრივ საქმიანობაზე და არღვევს გაერთიანებისა და გამოხატვის თავისუფლებას. ისინი ასუსტებენ კანონის უზენაესობას და დამატებით ზეწოლას ახდენენ დამოუკიდებელ სამოქალაქო საზოგადოებაზე, მათ შორის დამოუკიდებელ მედიაზე, ადამიანის უფლებათა დამცველებზე, ექსპერტებსა და მომსახურების მიმწოდებლებზე.
ამ ახალი რეგულაციებით საქართველოს ხელისუფლება განზრახ არღვევს საქართველოს მიერ ევროკავშირის წინაშე აღებულ ვალდებულებებს, განსაკუთრებით ევროკავშირთან ასოცირების შეთანხმებით.
ჩვენ შეგახსენებთ, რომ 2024 წლიდან საქართველოს მთავრობის მიერ განხორციელებულმა ქმედებებმა ფაქტობრივად შეაჩერა ევროკავშირში გაწევრიანების პროცესი, რასაც ადასტურებს 2024 წლის ევროპული საბჭოს დასკვნები და ადასტურებს ევროკომისია 2025 წლის გაფართოების ანგარიშში.
ჩვენ კიდევ ერთხელ ვადასტურებთ ჩვენს ურყევ მხარდაჭერას ქართველი ხალხისა და სამოქალაქო საზოგადოების ორგანიზაციების მიმართ, რომლებიც დაუღალავად მუშაობენ საქართველოს დემოკრატიული და ევროპული მომავლისთვის. ასევე, ჩვენ კვლავ ვადასტურებთ ჩვენს მხარდაჭერას საქართველოს სუვერენიტეტისა და ტერიტორიული მთლიანობის მიმართ მის საერთაშორისოდ აღიარებულ საზღვრებში.” – წერს საფრანგეთის მისია ეუთოში პლატფორმა X-ზე.
გუშინ ეუთოს 24 წევრი ქვეყნის ერთობლივი განცხადება გავრცელდა, სადაც ნათქვამია: “მოვუწოდებთ საქართველოს, შეცვალოს დემოკრატიული უკან დახევის კურსი და სრულად განახორციელოს ეუთოს 2026 წლის მოსკოვის მექანიზმის რეკომენდაციები”.
მოსკოვის მექანიზმის კრიტიკული ანგარიში გუშინ გამოქვეყნდა. ანგარიშში რეკომენდაციებია როგორც ქართული ოცნების, ისე ეუთოსა და საერთაშორისო თანამეგობრობის მიმართ. ასევე, საუბარია საკანონმდებლო რეფორმებსა და საქართველოში თავისუფალ არჩევნებთან დაკავშირებით.