ისრაელის პრემიერ-მინისტრის, ბენიამინ ნეთანიაჰუს განცხადებით, ირანის ირგვლივ განვითარებულ მოვლენებში „ბევრი სიურპრიზი“ არის მოსალოდნელი და ისრაელი აგრძელებს ბრძოლას ირანის „ტერორისტული რეჟიმის“ წინააღმდეგ. მისი თქმით, თეირანში რეჟიმის დამხობა თავად ირანელი ხალხის ძალისხმევის გარეშე შეუძლებელია, თუმცა მათ უკვე აცნობეს, რომ „დახმარება გზაშია“.
ნეთანიაჰუმ ასევე აღნიშნა, რომ ისრაელი ახლო აღმოსავლეთში ძალათა განლაგების შეცვლას ცდილობს და ქვეყანა დღეს „იმაზე ძლიერია, ვიდრე ოდესმე ყოფილა“.
“ბევრი სიურპრიზი გველოდება. ჩვენ გავანადგურეთ ძველი დიქტატორი, ახალი დიქტატორი კი, რევოლუციის გუშაგთა კორპუსის მარიონეტი, ვერ ბედავს საჯაროდ გამოჩენას. ჩვენ ვანადგურებთ ირანის ტერორისტულ რეჟიმს.
დანამდვილებით შემიძლია ვთქვა, რომ რეჟიმის დამხობა ირანელი ხალხის ძალისხმევის გარეშე შეუძლებელია და ჩვენ მათ ეს ვუთხარით.
ჩვენ ასევე ვუთხარით მათ, რომ დახმარება გზაშია. მე ვერ გეტყვით, რა მოხდება დღის ბოლოს. ამას არ გეტყვით. ჩვენ ვიცით, ჩვენ ვიმედოვნებთ და გვესმის, რომ თქვენც გაქვთ იმედი, რომ ეს რეჟიმი დაემხობა.
თუ რეჟიმი არ დაემხობა, ის ბევრად სუსტი იქნება, მაგრამ თუ ის დაემხობა, პრობლემა გადაიჭრება.
მე დაგპირდით, რომ ახლო აღმოსავლეთს ხელახლა ჩამოვაყალიბებდით, შევცვლიდით მტრებისა და მოკავშირეების განლაგებას და ისრაელს იმაზე ძლიერს გავხდიდით, ვიდრე ოდესმე ყოფილა. ამას ახლა ყველა ხედავს – მეზობლებიც და მტრებიც, – განაცხადა ნეთანიაჰუმ.