დუბაიში, დოჰასა და მანამაში, ასევე იერუსალიმში დღეს დილით ძლიერი აფეთქებების ხმები ისმოდა, თეირანი მესამე დღეა აგრძელებს ისრაელისა და სპარსეთის ყურის ქვეყნებზე დარტყმებს, – ინფორმაციას The Guardian-ი ავრცელებს.
სააგენტო „ფრანს-პრესის“ ცნობით, რამდენიმე ძლიერი აფეთქების ხმა გაისმა კატარისა და ბაჰრეინის დედაქალაქებში, ასევე არაბთა გაერთიანებული საამიროების ქალაქ დუბაიში.
მედიის ინფორმაციით, ქუვეითში, ირანის მიერ განხორციელებული საჰაერო თავდასხმების შემდეგ აშშ-ის საელჩოსთან შავი კვამლი დაფიქსირდა.
საელჩოს თავდასხმის ფაქტი არ დაუდასტურებია, თუმცა მოქალაქეებს მოუწოდა, საელჩოში მისვლისგან თავი შეიკავონ.
„ქუვეითზე რაკეტებითა და უპილოტო საფრენი აპარატებით თავდასხმის საფრთხე კვლავ არსებობს. ნუ მოხვალთ საელჩოში“, – ნათქვამია განცხადებაში.
მანამდე, ისრაელის საჰაერო ძალებმა განაცხადა, რომ ირანიდან ისრაელის მიმართულებით რაკეტები და დრონები გაისროლეს.