კიევი იმედოვნებს, რომ ჟენევის მოლაპარაკებებში მიღწეული პროგრესი გზას გაუხსნის რუსეთისა და უკრაინის ლიდერების პირისპირ შეხვედრას. რუსეთმა მთელი ღამის განმავლობაში უკრაინის მასშტაბით სარაკეტო და საჰაერო იერიშების სერია განახორციელა, რის შედეგადაც სულ მცირე რვა ადამიანი დაშავდა. ეს თავდასხმა წინ უძღოდა კიევსა და ვაშინგტონს შორის დაგეგმილ მორიგ მაღალი დონის შეხვედრას, რომლის მიზანიც უკვე მეხუთე წელში გადასული ომის დასრულებაა.
კიევის მერმა, ვიტალი კლიჩკომ განაცხადა, რომ ოთხშაბათს გამთენიისას დედაქალაქზე განხორციელებულმა ბოლო შეტევებმა დარნიცკის რაიონში ცხრასართულიანი საცხოვრებელი კორპუსი დააზიანა, რასაც ხანძარი მოჰყვა ერთ-ერთ კერძო სახლსა და ავტოფარეხებში. ქალაქის სამხედრო ადმინისტრაციის ხელმძღვანელის, თიმურ ტკაჩენკოს თქმით, დედაქალაქზე დარტყმებმა საჰაერო თავდაცვის სისტემების აქტივაცია გამოიწვია. მან მოუწოდა მოსახლეობას, თავდასხმის დასრულებამდე თავშესაფრებში დარჩენილიყვნენ. დედაქალაქში მსხვერპლის შესახებ ინფორმაცია არ გავრცელებულა.
უკანასკნელი თვეების განმავლობაში, მკაცრი ზამთრის პირობებში, უკრაინა რეგულარულად განიცდის ღამის იერიშებს — რუსეთი რაკეტებითა და დრონებით ბომბავს ქალაქებს და მიზანში იღებს სამოქალაქო ენერგეტიკულ ინფრასტრუქტურას. ეს ხდება იმ ფონზე, როდესაც ვაშინგტონი აგრძელებს მცდელობებს, მოლაპარაკებების გზით დაასრულოს მეორე მსოფლიო ომის შემდეგ ევროპაში ყველაზე სისხლისმღვრელი კონფლიქტი.
სააგენტო AFP-ის ცნობით, თავდასხმები ასევე განხორციელდა ხარკოვის, ზაპოროჟიესა და დნეპროპეტროვსკის ოლქებზე. ოფიციალური პირების ინფორმაციით, შვიდი ადამიანი დაშავდა ხარკოვში, ხოლო ერთი — დნეპროპეტროვსკის ოლქის ქალაქ კრივოი როგში.