აშშ-ის პრეზიდენტის, დონალდ ტრამპის, თითქმის ორსაათიანი ყოველწლიური მიმართვის (State of the Union) პარალელურად, ოსკაროსანმა მსახიობმა რობერტ დე ნირომ საჯარო განცხადება გააკეთა, რომელშიც მოქმედი პრეზიდენტის მიმართ მკვეთრი კრიტიკა გამოთქვა და საზოგადოებას წინააღმდეგობის გაწევისაკენ მოუწოდა.
დე ნირომ, რომელიც წლების განმავლობაში ტრამპის აქტიურ კრიტიკოსად მიიჩნევა, ტელეეთერში აღნიშნა, რომ მისი შეფასებით პრეზიდენტი „არასოდეს დატოვებს“ თანამდებობას და პასუხისმგებლობა მოქალაქეებზეა, რომ იგი ხელისუფლებას ჩამოაშორონ. მსახიობის თქმით, ტრამპის განცხადებები არჩევნების შესაძლო „ნაციონალიზაციის“ შესახებ ხუმრობა არ არის და მოვლენათა განვითარება სერიოზულ საფრთხეებზე მიუთითებს.
ჟურნალისტის კითხვაზე, ფიქრობს თუ არა, რომ ტრამპი დატოვებს თანამდებობას კონსტიტუციით განსაზღვრული ვადის ამოწურვის შემდეგ — რომლის მიხედვითაც ერთი და იგივე პირი პრეზიდენტად ორზე მეტ ვადით ვერ აირჩევა — 82 წლის მსახიობმა სკეპტიკური პოზიცია გამოხატა. მისი განცხადებით, მსგავსი მოლოდინი რეალისტური არ არის და „ყველაფერი მოქალაქეების ქმედებაზეა დამოკიდებული“.
დე ნირომ საკუთარ გამოსვლაში აღნიშნა, რომ ქვეყანა სერიოზული გამოწვევის წინაშე დგას და, მისი შეფასებით, მიმდინარე პოლიტიკური პროცესები ამერიკის დემოკრატიულ საფუძვლებს აზიანებს. ემოციური ტონით მან საზოგადოებას აქტიურობისა და წინააღმდეგობისკენ მოუწოდა და ხაზი გაუსვა, რომ მარტივი გამოსავალი არ არსებობს.
მსახიობის თქმით, დგება მომენტი, როდესაც საზოგადოებამ საკუთარი მომავლისა და უსაფრთხოების დასაცავად გადამწყვეტი ნაბიჯი უნდა გადადგას. მისი განცხადებით, არსებული ვითარება მოითხოვს გამბედაობას და სამოქალაქო პასუხისმგებლობის განცდას, რადგან ქვეყნის მომავალი სწორედ მოქალაქეთა მოქმედებაზეა დამოკიდებული.