უკრაინის ეროვნული ანტიკორუფციული ბიუროსა და სპეციალიზებული ანტიკორუფციული პროკურატურის თანამშრომლებმა 15 თებერვლის ღამეს საზღვრის გადაკვეთის მცდელობისას უკრაინის ენერგეტიკის ყოფილი მინისტრი ჰერმან გალუშჩენკო დააკავეს, – ინფორმაციას უკრაინული მედია ავრცელებს.
გავრცელებული ინფორმაციით, ყოფილი მინისტრი მატარებლიდან ჩამოიყვანეს.
წყარო დასძენს, რომ სასაზღვრო პოლიციას ეროვნული ანტიკორუფციული ბიუროსა და სპეციალიზებული ანტიკორუფციული პროკურატურისგან მიღებული ჰქონდა მოთხოვნა, უწყებებისთვის მიეწოდებინა ინფორმაცია იმ შემთხვევაში, თუ გალუშჩენკო საზღვრის გადაკვეთას შეეცდებოდა.
სპეციალიზებულმა ანტიკორუფციულმა პროკურატურამ მოგვიანებით დაადასტურა, რომ გალუშჩენკო სახელმწიფო საზღვრის გადაკვეთისას „მიდასის“ საქმის ფარგლებში დააკავეს.
ცნობისთვის, 10 ნოემბრის დილით გავრცელდა ინფორმაცია, რომ უკრაინის ეროვნული ანტიკორუფციული ბიურო ბიზნესმენ ტიმურ მინდიჩისა და მაშინდელი იუსტიციის მინისტრის, ჰერმან გალუშჩენკოს სახლებში ჩხრეკას ატარებდა. იმავე დღეს, უკრაინის ეროვნულმა ანტიკორუფციულმა ბიურომ გამოაცხადა, რომ ენერგეტიკის სექტორში თანხების მითვისების მასშტაბური კორუფციული სქემა გამოავლინა და საქმეში ბრალდებულებს შორის საუბრების აუდიოჩანაწერები გამოაქვეყნა. ოპერაციას „მიდასი“ ეწოდა. 19 ნოემბერს უკრაინის პარლამენტმა გალუშჩენკოს იუსტიციის მინისტრის თანამდებობიდან გათავისუფლებას მხარი დაუჭირა.