მას შემდეგ, რაც ბრიტანულმა სამაუწყებლო კორპორაციამ უპასუხა „ქართული ოცნების“ საჩივარს დეკემბერში გამოქვეყნებული ჟურნალისტური გამოძიების გამო, პარტია სამართლებრივი დავის გაგრძელებას აანონსებს.
„ქართული ოცნების“ ერთ-ერთმა ლიდერმა შალვა პაპუაშვილმა 13 თებერვალს პარლამენტში ჟურნალისტებთან საუბრისას დაადასტურა, რომ BBC-სგან პასუხი მიიღეს.
„მათ წინასწარვე ჰქონდათ თავის პოზიცია გამჟღავნებული, რომ არ აპირებენ გადახედონ საკუთარი ჟურნალისტების საქმიანობას და ამ პასუხშიც იგივე პოზიციაა“, – განაცხადა მან.
პაპუაშვილის თქმით, უკვე მუშაობენ საპასუხო მიმართვაზე, რომელიც „ბრიტანეთის კანონმდებლობიდან გამომდინარე კვლავ BBC-ში უნდა გასაჩივრდეს შიდა რეგულაციის მეორე დონეზე“.
მანამდე ტელეკომპანია „ფორმულამ“ გაავრცელა BBC-ის კომენტარი, რომლის თანახმადაც:
„დამკვიდრებული საჩივრების პროცესის შესაბამისად, შეგვიძლია დავადასტუროთ, რომ ვუპასუხეთ მომჩივანს მათ კითხვებზე პასუხის გასაცემად“.
- იანვარში საჩივრის მიღების შემდეგ რადიო თავისუფლებასთან კომენტარში BBC-მ დაიცვა ჟურნალისტური ნამუშევარი.
- საჩივრით „ქართული ოცნება“ ითხოვს ფილმისა და მასთან დაკავშირებული მასალების აღებას შესაბამისი პლატფორმებიდან და BBC-ს მხრიდან საჯარო ბოდიშის მოხდას.
- იანვარში პაპუაშვილმა განაცხადა, რომ თუკი BBC შიდა რეგულირების მექანიზმებით მოთხოვნას არ დააკმაყოფილებს, გააგრძელებენ სამართლებრივ დავას კომუნიკაციების ბიუროში.
- „თუ იქაც არ აღმოიფხვრა დარღვევა, ამის შემდეგ გვექნება შესაძლებლობა, მივმართოთ დიდი ბრიტანეთის სასამართლოს“, – განაცხადა მან მაშინ.