უკრაინის საგარეო საქმეთა მინისტრი, ანდრიი სიბიჰა ეხმაურება FIFA-ს პრეზიდენტს, ჯანი ინფანტინოს გაკეთებულ კომენტარს, რომ ორგანიზაციის მიერ რუსეთის წინააღმდეგ დაწესებული შეზღუდვები მოსახსნელია.
სიბიჰამ ინფანტინოს “მორალური დეგენერატი” უწოდა.
“679 უკრაინელი გოგო და ბიჭი ვერასდროს შეძლებს ფეხბურთის თამაშს, რადგან რუსეთმა ისინი მოკლა და აგრძელებს კიდევ მეტის მოკვლას მაშინ, როდესაც მორალურ დეგენერატებს შეზღუდვების მოხსნა სურთ, მიუხედავად იმისა, რომ რუსეთი ომს არ ასრულებს. მომავალი თაობები ამას როგორც 1936 წლის ოლიმპიადის მსგავს სირცხვილად შეხედავენ” – წერს სიბიჰა.
ინფანტინომ Sky Sports-თან თქვა, რომ FIFA-მ რუსეთის წინააღმდეგ, განსაკუთრებით, ახალგაზრდებში შეზღუდვები უნდა მოხსნას.
“ეს უნდა გავაკეთოთ. აუცილებლად. ამ შეზღუდვამ არაფერი მოიტანა, მხოლოდ დამატებითი იმედგაცრუება და ზიზღი. რუსი ბიჭებისთვისა და გოგოებისთვის ევროპის სხვა ნაწილებში ფეხბურთის თამაშის უფლების მიცემა შეიძლება დაგვეხმაროს” – თქვა ინფანტინომ.