სირიის მთავრობის უსაფრთხოების ძალები, აშშ-ის მიერ მხარდაჭერილი ცეცხლის შეწყვეტის შეთანხმების თანახმად, ქვეყნის ჩრდილო-აღმოსავლეთში მდებარე ქურთების მიერ კონტროლირებად ქალაქში განლაგდნენ.
როგორც „როიტერი“ წერს, შეთანხმება ქურთების მიერ მართული რეგიონების დამასკოსთან გაერთიანებას ითვალისწინებს.
გამოცემის ინფორმაციით, მათმა ჟურნალისტებმა დღის დასაწყისში შინაგან საქმეთა სამინისტროს მანქანის 30-ზე მეტი კოლონა დაინახეს, რომლებიც ქალაქ ჰასაკში შევიდნენ.
გამოცემის ინფორმაციით, პარასკევს გამოცხადებულმა შეთანხმებამ სირიის პრეზიდენტ აჰმედ ალ-შარაას მთავრობასა და ქურთების ხელმძღვანელობით მოქმედ სირიის დემოკრატიულ ძალებს შორის შემდგომი კონფლიქტი თავიდან აიცილა.
„როიტერი“ წერს, რომ სირიის დემოკრატიული ძალები ოდესღაც ვაშინგტონის მთავარი მოკავშირე იყო და სასიცოცხლოდ მნიშვნელოვან როლს ასრულებდა „ისლამური სახელმწიფოს“ მებრძოლების წინააღმდეგ ბრძოლაში. თუმცა, აშშ-ის მხარდაჭერა მას შემდეგ შესუსტდა, რაც აშშ-ის პრეზიდენტმა დონალდ ტრამპმა მჭიდრო კავშირები დაამყარა ალ-შარასთან, სირიის ახალ პრეზიდენტთან.