ვაკის პარკის უფროსი მებაღე და “ეკოსერვისის” თანამშრომელი დევი მეზურნიშვილი, რომელმაც 2 ბავშვი სიკვდილს გადაარჩინა ამბობს, რომ მზად იყო საკუთარი სიცოცხლე ბავშვების გადასარჩენად გაეწირა.
მისივე თქმით, მათი გადარჩენის გარდა არაფერზე უფიქრია და ცდილობდა სწრაფად ემოქმედა.
“არაფერზე არ მიფიქრია, მხოლოდ მათ გადარჩენაზე ვფიქრობდი. მომესწრო და ეცოცხლათ. თვალწინ მედგა, ის ფაქტი, რომ ეს შეიძლებოდა ჩემს შვილს დამართნოდა. ირგვლივ ყველა დახმარებას ითხოვდა. რაც უფრო ახლოს მივდიოდი უფრო რთულდებოდა, ძლიერი დენი მოდიოდა იქეთ მხრიდან. ეს ერთი ამოვიყვანე, მეორესთან ძალიან გამიჭირდა. დენი მაქცევდა და ფეხზე დგომა მიჭირდა. მესამედ შევბრუნდი გოგონას გულისთვის, მაგრამ ვერანაირად ვერ ვუახლოვდებოდი, მეტი სიძლიერე ჰქონდა დენს და ვერანაირად ვერ ვჩერდებოდი. მივლიდა და სუნთქვას მიკრავდა. შადრევანი გათიშეს და მანამდე ალბათ ვერავინ გაბედა ჩასვლა. ვცდილობდი სწრაფად მეშველა მათთვის. ყველანაირად ვეცადეთ რომ გადარჩენილიყო, მაგრამ ვერ ვუშველეთ. ის ბავშვი მინდა ცოცხალი იყოს და თუნდაც მე დავრჩენილიყავი შიგნით”, – საუბრობს დევი მეზურნიშვილი “პალიტრანიუსის” ეთერში.
ცნობისთვის, ვაკის პარკში, შადრევანში სამი ბავშვი ბურთის ამოსატანად ჩავიდა, რა დროსაც მათ დენმა დაარტყა. ბავშვები კლინიკაში სასწრაფო დახმარების ბრიგადამ გადაიყვანა. ერთ-ერთი ბავშვის, 13 წლის გოგონას მდგომარეობა თავიდანვე მძიმე იყო და ის ხეჩინაშვილის კლინიკაში გარდაიცვალა.