მსოფლიოს პირველი ჩოგანი ნოვაკ ჯოკოვიჩი აკრიტიკებს Wimbledon-ის ორგანიზატორების გადაწყვეტილებას, რომლის მიხედვითაც, რუსი და ბელარუსი ჩოგბურთელები ტურნირზე არ დაიშვებიან.
სერბი სპორტსმენის ნათქვამი ჟურნალისტმა საშა ოზმომ Twitter-ზე გაასაჯაროვა.
“ეს რაღაც სიგიჟეა. სპორტსმენებს უკრაინაში არსებულ სიტუაციასთან არანაირი შეხება არ აქვთ. არ შეიძლება სპორტის გარევა პოლიტიკაში”, – აცხადებს ჯოკოვიჩი.
ცნობისთვის, პროფესიონალ ჩორგბურთელთა ასოციაციამ (ATP) აგრეთვე გააკრიტიკა უიმბლდონის გადაწყვეტილება და ეს შეაფასა, როგორც ნაციონალური ნიშნით დისკრიმინაცია.
“სპორტის ეს სახეობა ხელმძღვანელობს [ჩოგბურთელთა] მიღწევებისა და სამართლიანობის ფუნდამენტური პრინციპების მიხედვით. მიგვაჩნია, რომ უიმბლდონის გადაწყვეტილება რუსი და ბელარუსი მოთამაშეების წლევანდელი ტურნირიდან მოხსნის შესახებ, უსამართლოა და შეიძლება, დამაზიანებელი აღმოჩნდეს”, – ნათქვამია ATP-ის ვებ-გვერდზე გავრცელებულ განცხადებაში, რომელშიც ასევე აღნიშნულია, რომ ისინი კატეგორიულად გმობენ რუსეთის შეჭრას უკრაინაში.