“პატრიოტთა ალიანსი” რუსეთის ფედერალური საბჭოს საგარეო ურთიერთობათა კომიტეტის თავმჯდომარის მოადგილეს, ვლადიმირ ჯაბაროვს შეხვდა. ამის შესახებ ცნობა რუსეთის ფედერაციის ფედერალური ასამბლეის საბჭოს ფედერაციის ვებ-გვერდზე გამოქვეყნდა. საიტზე გავრცელებული ფოტოებიდან ირკვევა, რომ პარტიას შეხვედრაზე ირმა ინაშვილი და დავით თარხან-მოურავი წარმოადგენდნენ.
როგორც ინფორმაციაშია აღნიშნული, მხარეებმა რუსეთ-საქართველოს ურთიერთობების განვითარების საკითხებზე იმსჯელეს და მიიღეს გადაწყვეტილება, რომ დიალოგი მომავალშიც გაგრძელდება.
ფედერალური ასამბლეის საბჭოს ფედერაციის მიერ გავრცელებული განცხადების თანახმად, დავით თარხან-მოურავმა შეხვედრაზე “საქართველოს პატრიოტთა ალიანსის” საქმიანობის შესახებ ისაუბრა და აღნიშნა, რომ პარტია საერთაშორისო ასპარეზზე ქვეყნის ნეიტრალიტეის ერთგულია. მან ასევე განაცხადა, რომ მხარს უჭერს რუსეთ-საქართველოს ურთიერთმომგებიანი ურთიერთობების მომავალ განვითარებას.
“ჩვენს ქვეყნებს მრავალსაუკუნოვანი მეგობრობა აკავშირებთ. დარწმუნებული ვარ, რომ საქართველოში ძალიან ბევრი ადამიანია, რომლებიც რუსეთთან კონტაქტების გაფართოების სურვილს გამოთქვამენ”, – განაცხადა შეხვედრაზე ჯაბაროვმა.