კიევის ერთ-ერთ რაიონში 9-სართულიან შენობას ჭურვი ესროლეს, – აღნიშნულის შესახებ ინფორმაციას საგანგებო სიტუაციების სახელმწიფო სამსახური ავრცელებს.
მედიის ცნობით, 07:40 საათისთვის ცხრასართულიან საცხოვრებელ კორპუსში 2 გარდაცვლილის ცხედარი იპოვეს, 3 ადამიანი ჰოსპიტალიზებულია, 9-მ კი ადგილზე დახმარება მიიღო.
“დილის 5:09 საათზე კიევში საგანგებო სიტუაციების სახელმწიფო სამსახურის მთავარი სამმართველოს ოპერატიული საკოორდინაციო ცენტრმა მიიღო შეტყობინება დედაქალაქის ობოლონსკის რაიონში გაჩენილი ხანძრის შესახებ.
უცნობი ობიექტის დარტყმის შედეგად ნაწილობრივ დაინგრა კიბე 1-დან მე-3 სართულამდე და მთლიანად განადგურდა სახლის ფასადი, ასევე ხანძარი გაჩნდა მე-3 და მე-4 სართულების ბინებშიც”, – ნათქვამია ინფორმაციაში.
საგანგებო სიტუაციების სამსახურმა 15 ადამიანი გადაარჩინა და 63 ადამიანის ევაკუაცია მოახდინა, დანარჩენების ძებნა გრძელდება.