სახელმწიფო უსაფრთხოების სამსახური უკრაინაში მიმდინარე ომის ფონზე, საქართველოში რუსეთისა და ბელარუსის მაცხოვრებლების შემოსვლის თაობაზე განცხადებას ავრცელებს და ცნობებს აღნიშნული ქვეყნების მოქალაქეების მასიურ შემოდინებასთან დაკავშირებით, მიზანმიმართულ დეზინფორმაციას უწოდებს. უწყების მტკიცებით, ქვეყანაში შემომსვლელ პირთა რაოდენობა არ აღემატება გასული წლების ანალოგიური პერიოდის სტატისტიკას და საქართველოში უსაფრთხოების გარემო სრულ კონტროლს ექვემდებარება.
“გვსურს გამოვეხმაუროთ ბოლო დღეების განმავლობაში მიზანმიმართულად გავრცელებულ დეზინფორმაციას საქართველოში უცხო ქვეყნის მოქალაქეების, კერძოდ, რუსეთის ფედერაციისა და ბელარუსის მოქალაქეების ე.წ. მასიური და უკონტროლო შემოდინების შესახებ.
მიმდინარეობს საზოგადოების დაშინება შემოსულ პირთა შორის ე.წ. დივერსანტების, ტერორიზმთან დაკავშირებული ჯგუფების და ა.შ. არსებობის შესახებ.
სრული პასუხისმგებლობით ვაცხადებთ, რომ ქვეყანაში არსებული უსაფრთხოების გარემო სრულ კონტროლს ექვემდებარება. სახელმწიფო უსაფრთხოების სამსახური სხვა შესაბამის უწყებებთან ერთად აქტიურ რეჟიმში ატარებს ყველა საჭირო ღონისძიებას, რათა მინიმუმამდე შემცირდეს შესაძლო რისკები და გამოწვევები, ასევე სრულად იქნას გაკონტროლებული ქვეყანაში მყოფი პოტენციური რისკის შემცველი ყველა პირი.
გატარებული ღონისძიებების შედეგად ქვეყნის მასშტაბით შენარჩუნებულია მშვიდი და უსაფრთხო გარემო. ქვეყანაში შემოსული რუსეთის ფედერაციის, ბელარუსის და სხვა უცხო ქვეყნების მოქალაქეების მიერ არ შეიმჩნევა ქვეყნის უსაფრთხოებისათვის რისკის შემცველი აქტივობების განხორციელების ტენდენცია.
აქვე უნდა აღინიშნოს, რომ მიმდინარე პერიოდში ქვეყანაში შემომსვლელ პირთა რაოდენობა არ აღემატება გასული წლების ანალოგიური პერიოდის სტატისტიკას. საქართველოს სახელმწიფო, ქვეყნის ტერიტორიაზე უცხო ქვეყნის მოქალაქის დაშვების სუვერენულ უფლებას ახორციელებს კანონმდებლობის სრული დაცვით, არსებული რისკებისა და გამოწვევების შესაბამისად”, – ნათქვამია უწეყბის განცხადებაში.
შეგახსენებთ, მას შემდეგ, რაც რუსეთს და ბელარუსს უკრაინაში დაწყებული ომის გამო სანქციები დაუწესდათ, აღნიშნული ქვეყნებიდან ჩამოსული პირები თბილისის აეროპორტში ჟურნალისტებს ეუბნებიან, რომ საკუთარი ქვეყნები პროტესტის ნიშნად დატოვეს და არ იციან, რამდენ ხანს დარჩებიან საქართველოში.