საქართველოს მთავრობიდან არავითარი მხარდაჭერა არ ყოფილა, რადგან პუტინს უგორებენ კოჭს! ეს იმდენად აშკარად იგრძნობა, მთელი საქართველო ხვდება მაგას. როგორც მოგახსენეთ, უკრაინა ჩვენი მეგობარი ქვეყანაა, პირადად ჩემი დამეგობრება ამ ქვეყანასთან ძალიან დიდი ხნის წინ დაიწყო. მე დიდ პატივს ვცემ უკრაინის პრეზიდენტს – ვოლოდიმირ ზელენსკის. განათლებული, ახალგაზრდა, ნიჭიერი კაცია! მის ხელში, მე მგონი, ყველაფერი კარგად იქნება! ზელენსკი ძალიან გაბედულიცაა… ამ შემთხვევაში გაბედვა-არგაბედვა არ თამაშობს გადამწყვეტ როლს. როდესაც შენს ქვეყანას გეცილებიან, ვალდებული ხარ, დაიცვა! ასეა ეს და ამიტომაც ვნახოთ, რა იქნება! მე ძალიან მიყვარს უკრაინელი ხალხი, სხვანაირად ვერც წარმომიდგენია, ჩვენი უახლოესი მეგობრები არიან. ჩვენ ყველა მათ მხარეზე უნდა ვიყოთ და ვართ კიდეც, ჩვენი მთავრობის გარდა!
განაცხადა კვირის პალიტრასთან საუბარში მომღერალმა ბუბა კიკაბიძემ.