ენკას ქართველი დირექტორის, მერაბ ლომინაძის თქმით, ნამოხვანჰესის პროექტთან დაკავშირებული ყველა დოკუმენტი საკმაოდ კვალიფიციურია და ერთადერთი პრობლემა, რაც მათი მხრიდან იდენტიფიცირებულია, არის კომუნიკაციის პრობლემა, არამარტო ხეობის მოსახლეობასთან, არამედ ზოგადად ქვეყნის მოსახლეობასთან და ყველა დაინტერესებულ ჯგუფთან. ამის შესახებ Forbesკვირასთან ინტერვიუში განაცხადა.
„მოგეხსენებათ ეს არ გახლავთ 5-20-50 მეგავატიანი ჰიდროელექტოსადგური, ეს გახლავთ 438 მეგავატიანი ჰიდროელექტოსადგური, ეს გახლავთ ყველაზე დიდი საინვესტიციო პროექტი დამოუკიდებელი საქართველოს ისტორიაში და მე ვთვლი, რომ კომუნიკაცია ჯეროვნად უნდა შემდგარიყო საზოგადოების აბსოლუტურად ყველა დაინტერესებულ მხარესთან, რაც ცხადია ვერ შედგა. ძალიან ბევრი ხმა არ იქნა გაგონილი, ძალიან ბევრი წუხილი, როგორც ჩანს, არ იქნა მოსმენილი. ჩვენ მზად ვართ, რაც დავინახეთ, ყველა ეს ხარვეზი აღმოვფხვრათ და არაერთი პლატფორმა გამოვიყენოთ ამისთვის.
სამწუხაროდ უკუკავშირი ამ ეტაპზე არ არსებობს. სამწუხაროდ საგნობრივ დისკუსიაში ის მხარე, რომელიც აპროტესტებს ამ პროექტს, არ ერთვება, მაგრამ იმედს ვიტოვებთ, რომ დიალოგის იქით გზა არ არსებობს. ეს იმ მასშტაბის პროექტია, რომელიც საჭიროებს ერთობლივ გადაწყვეტილებას და საერთო კონსენსუსს და თუ არ მოხდა აზრთა შეჯერება, მე შეუძლებლად მიმაჩნია ეს პროექტი განხორციელდეს“-განაცხადა მერაბ ლომინაძემ.
წყარო: BM.GE
პროტესტი ნამოხვანჰესის წინააღმდეგ
ნამოხვანის ჰესების კასკადის მშენებლობის წინააღმდეგ, სოფელ ნამოხვანში 168 დღე კარვები იყო გაშლილი. ნამახვანი ჰესის პროექტი ორი, 333 და 100 მგვტ სიმძლავრის ჰესის მშენებლობას გულისხმობს მდინარე რიონზე. მისი ღირებულება 800 მილიონ აშშ დოლარზე მეტია, თუმცა ქვეყანაში აქედან 527 მლნ იხარჯება და აშენებს კომპანია ენკა რინიუებლზ მისი წილების 90%-ზე მეტს თურქული კომპანია ენკა ფლობს, 10%-ს კი ნორვეგიული კომპანია.
პროტესტი
2021 წლის 3 აპრილს კომპანიაში ახალდანიშნული დირექტორი მერაბ ლომინაძე ხეობაში საპოლიციო ძალის ფონზე ჩავიდა და თქვა, რომ კომპანიას უნდა გაეგრძელებინა მოსამზადებელი სამუშაოები. სწორედ ამ განცხადების შემდგომ დაიწყეს გამოსლვლები კარვებში მყოფმა პროტესტანტებმა.
11 აპრილს პოლიციამ ნამოხვანში აქტივისტებს კარვები დაუშალეს, მიზეზად კი უაფრთხოება მოიყვანეს. იქ მყოფი პროტესტანტები ამბობდნენ, რომ პოლიციამ კარვებში ალკოჰოლი შეიტანა. აქტივისტები ამას პროტესტის დისკრედიტაციის მცდელობად აფასებენ და ალკოტესტის ჩატარებას ითხოვენ, რათა დადასტურდეს, რომ სასმელს თავად არ მოიხმარდნენ. სწორედ კარვების აღების შემდეგ პოლიციამ ნამახვანისკენ გზა ჩაკეტა
მეორე დღეს გუმათჰესთან, — რომელიც სოფელი ნამოხვანიდან დაახლოებით 18 კილომეტრის დაშორებით მდებარეობს, – პროტესტანტებს აღმართული დახვდათ საპოლიციო ბლოკპოსტი, რასაც მოსახლეობა, ასევე, პროტესტით შეხვდა. 14 აპრილს პოლიციამ უკვე რკინის ბარიკადები აღმართა გუმათჰესთან.
აღსანიშნავია ისიც, რომ კარვების აშლის შემდეგ დილას, 12 აპრილს, — როდესაც აქციამ გუმათჰესთან გადაინაცვლა და ნამოხვანში დემონსტრანტები არ იყვნენ, — საბანაკე ადგილი კომპანიის ტრაქტორებმა გადახნეს.
საპროტესტო აქციების ერთ-ერთი ლიდერის, ვარლამ გოლეთიანის განცხადებით, თუ მათ არ ექნებათ პროტესტის მშვიდობიანად გაგრძელების შესაძლებლობა სოფელ ნამახვანში, პროცესი დადაქალაქში გადაინაცვლებს.
ნამოხვანჰესის მშენებლობის მოწინააღმდეგეებმა 14 აპრილს ქუთაისში მორიგი მასშტაბური დემონსტრაცია გამართეს, ღამე კი პროტესტის ნიშნად ქუთაისის ცენტრალურ მოედანზე გაათიეს.
მოლაპარაკება მთავრობასთან
ნამოხვანჰესის მშენებლობის მოწინააღმდეები და მთავრობის წარმომადგენლებს 16 აპრილს შეხვდნენ, შეხვედრა თითქმის ოთხს საათს გაგრძელდა. ეს შეხვედრა მთავრობის ადმინისტრაციის ინიციატივით დაიგეგმა. პრემიერმინისტრ ირაკლი ღარიბაშვილის დავალებით აქტივისტებს მთავრობის ადმინისტრაციის რეგიონებთან ურთიერთობის დეპარტამენტის უფროსი, ლერი ბარნაბიშვილი და ორი გუბერნატორი — ზვიად შალამბერიძე და პარმენ მარგველიძე ხვდებიან. დიალოგში, ასევე, მონაწილეობენ საპარლამენტო უმრავლესობის დეპუტატები — სოზარ სუბარი, გივი ჭიჭინაძე, ზაზა ლომინაძე, ბეჟან წაქაძე, გოჩა ენუქიძე, დიმიტრი სამხარაძე და გოდერძი ჩანქსელიანი.
ნამოხვანჰესისი მშენებლობის საწინააღმდეგო აქციის მონაწილეები, მთავრობის წევრებთან შეხვედრის შემდეგ, ხელისუფლების გადაწყვეტილების მოლოდინში არიან. მათ მიერ დასახელებული სამი პირობიდან ერთი – რკინის კედლის აღება ნაწილობრივ უკვე შესრულდა. სოფელ გუმათში აღმართული რკინის კედლის ნაწილი პოლიციამ გზის სავალი ნაწილიდან აიღო, თუმცა ჯებირები ადგილზე ისევ რჩება.
ნამოხვანჰესის მშენებლობის მოწინააღმდეგეების თქმით, დიალოგი კონსტრუქციულ რეჟიმში მას შემდეგ გაგრძელდება, რაც მათი მოთხოვნები სრულად შესრულდება.