ჩინეთის რაკეტა Long March 5B-ის ნარჩენები, დედამიწის ატმოსფეროში შემოსვლის შემდეგ, ინდოეთის ოკეანეში ჩაცვივდა. აღნიშნულ ინფორმაციას BBC ჩინეთის სახელმწიფო მედიაზე დაყრდნობით ავრცელებს.
როგორც სახელმწიფო მედია იუწყება, რაკეტის ნარჩენები ოკეანეში, პეკინის დროით, 10:24 საათზე მალდივის კუნძულების დასავლეთით ჩაცვივდა.
21-ტონიანი რაკეტა ჩინეთმა 28 აპრილს გაუშვა და ამით საკუთარი კოსმოსური სადგურის მშენებლობა დაიწყო. რაკეტა კოსმოსში 29 000 კმ/სთ-ში სიჩქარით გადაადგილდებოდა.
არსებობდა ვარაუდი, რომ მისი ნაწილები იტალიის 9 რეგიონიდან ერთ-ერთში ჩავარდებოდა.
რაკეტის გადაადგილების ტრაექტორიას პენტაგონი და NASA აკვირდებოდა.