საქართველოს პროკურატურამ 2018 წლის 16 მარტს გუდაურში საბაგიროს ჩამოვარდნის ფაქტზე 2 მემანქანე- ოპერატორს ბრალი წარუდგინა. ამის შესახებ პროკურატურამ განცხადება გაავრცელა.
განცხადებაში აღნიშნულია, რომ ოპერატორებმა ძაბვის ვარდნის შემდეგ ავარიულად გაჩერებული საბაგიროს უსაფრთხოდ მართვა ვერ შეძლეს და დაარღვიეს ექსპლუატაციის წესი.
“საქართველოს პროკურატურამ, 2018 წლის 16 მარტს გუდაურში, ე.წ „საძელე”-ს მთაზე მომხდარი საბაგირო ტრანსპორტის მოძრაობის უსაფრთხოების და ექსპლუატაციის წესის დარღვევის შედეგად მოქალაქეთა ჯანმრთელობის დაზიანების ფაქტზე შპს „მთის კურორტების განვითარების კომპანიის” მემანქანე-ოპერატორებს ვ.ო.-ს და ლ.წ.-ს ბრალდება წარუდგინა.
პროკურატურამ გამოძიება ექსპლუატაციის წესის დარღვევაზე დაიწყო, რამაც მოქალაქეთა ჯანმრთელობის ნაკლებად მძიმე და მძიმე დაზიანებები გამოიწვია.
“შინაგან საქმეთა სამინისტროს მიერ ჩატარებული გამოძიებით დადგინდა, რომ ყაზბეგის მუნიციპალიტეტის დაბა გუდაურში ე.წ „საძელე”-ს მთაზე განთავსებული საბაგირო გზა ელექტრო ენერგიის ძაბვის ვარდნის შედეგად, ავარიულად გაჩერდა. საბაგირო გზის უსაფრთხოებასა და ექსპლუატაციაზე პასუხისმგებელმა პირებმა – შპს „მთის კურორტების განვითარების კომპანიის” თანამშრომლებმა – ვ.ო.-მ და ლ.წ.-მ დაარღვიეს საბაგირო ტრანსპორტის ექსპლუატაციის წესი და ვერ უზრუნველყვეს მისი უსაფრთხო მართვა, რის შედეგადაც საბაგიროს ხუთმა მგზავრმა ჯანმრთელობის მძიმე და ნაკლებად მძიმე ხარისხის დაზიანებები მიიღეს.
პროკურატურამ ვ.ო.-ს და ლ.წ.-ს ბრალდება საქართველოს სისხლის სამართლის კოდექსის 275-ე მუხლის პირველი ნაწილით (საბაგირო ტრანსპორტის მოძრაობის უსაფრთხოების და ექსპლუატაციის წესის დარღვევა, რამაც მოქალაქეთა ჯანმრთელობის ნაკლებად მძიმე და მძიმე დაზიანებები გამოიწვია) წარუდგინა, რაც სასჯელის სახედ და ზომად ორიდან ხუთ წლამდე თავისუფლების აღკვეთას ითვალისწინებს.
პროკურატურა ბრალდებულებისთვის აღკვეთის ღონისძიების შეფარდების შუამდგომლობით სასამართლოს კანონით დადგენილ ვადაში მიმართავს.
სისხლის სამართლის საქმეზე გამოძიება გრძელდება”, – ნათქვამია განცხადებაში
შეგახსენებთ, გუდაურის ზამთრის კურორტზე საბაგირო ავარიულად 2018 წლის 16 მარტს გაითიშა, რის შედეგადაც ყველაზე მაღალ წერტილზე დამონტაჟებული საბაგირო გზა მწყობრიდან გამოვიდა. შემთხვევის შედეგად დაშავდა ათამდე ადამიანი. მათ შორის, შვედეთის, უკრაინის და რუსეთის მოქალაქეები.