ამერიკის შეერთებული შტატების შტატების სახელმწიფო დეპარტამენტი მიესალმება საქართველოში მმართველი ძალისა და ოპოზიციას შორის შეთანხმების მიღწევას.
განცხადება დეპარტამენტის პრესსპიკერმა ნედ პრაისმა ოფიციალურ ტვიტერის გვერდზე დაწერა. მისი თქმით ეს მნიშვნელოვანი პროგრესია საქართველოსთვის.
“მივესალმებით საქართველოში 19 აპრილს მიღწეულ შეთანხმებას. ეს კეთილი ნების ნიშანი საქართველოს დემოკრატიული განვითარებისთვის მნიშვნელოვანი პროგრესია. ასევე მნიშვნელოვანი იქნება შეთანხმების ძალაში შეყვანა. ჩვენ საქართველოს კვლავ ერთგულად დავეხმარებით ამ შეთანხმების მიზნების მიღწევაში”, – დაწერა ნედ პრაისმა.
შეგახსენებთ, რომ 19 აპრილს პრეზიდენტის ადმინისტრაციაში ოპოზიციის ნაწილმა და მმართველმა პარტიამ შარლ მიშელის მიერ შეთავაზებულ დოკუმენტს ხელი მოაწერა.
ოპოზიციური პარტიებიდან ხელი მოაწერეს ლელომ (ბადრი ჯაფარიძე, მამუკა ხაზარაძე), სტრატეგია აღმაშენებელმა (გიორგი ვაშაძე), გირჩმა (ვახტანგ მეგრელიშვილი), გირჩი-მეტი თავისუფლებამ (ზურაბ ჯაფარიძე), მოქალაქეებმა (ალეკო ელისაშვილი), რესპუბლიკურმა პარტიამ (ხათუნა სამნიძე), ასევე, ინდივიდუალურად მოაწერეს ხელი არჩეულმა დეპუტატმა დავით ბაქრაძემ და ენმ-ის წევრმა სალომე სამადაშვილმა.
ქართული ოცნებიდან ხელი მოაწერეს არჩილ თალაკვაძემ და შალვა პაპუაშვილმა.
პოლიტიკური კრიზისი საქართველოში 2020 წლის საპარლამენტო არჩევნების შემდეგ დაიწყო. ოფიციალური შედეგების გამოცხადების შემდეგ, მათ არჩევნები გაყალბებულად გამოაცხადეს, პარლამენტში საქმიანობაზე უარი თქვეს და მოითხოვეს ცესკოს თავმჯდომარის შეცვლა, რიგგარეშე არჩევნების ჩატარება ახალი კანონმდებლობით და პოლიტპატიმრების გათავისუფლება.
პოლიტიკური კრიზისის მოგვარება ფასილიტატორმა ელჩებმა სცადეს და ხელისუფლება და ოპოზიცია მოლაპარაკების მაგიდასთან მიიწვიეს. მათი შუამავლობით ოპოზიციასა და ხელისუფლებას შორის მოლაპარაკებების ოთხი რაუნდი გაიმართა, თუმცა შეთანხმება ვერ შედგა.
მოლაპარაკებები ევროპელი პარტნიორებისა და ელჩების მონაწილეობით რამდენიმე თვე მიმდინარეობდა.