“ნაციონალური მოძრაობის” თავმჯდომარის, ნიკა მელიას მამა, ცნობილი კარდიოლოგი ანზორ მელია აცხადებს, რომ 2012 წელს შვილთან ბიძინა ივანიშვილმა დააპირისპირა. ამის შესახებ მან გადაცემა “სთორიში” ისაუბრა.
“რატომ მომატყუა 2012 წელს ასე მწარედ და რატომ დამაპირისპირა ჩემს შვილთან? კინაღამ დავკალით ერთმანეთი. ეს ვერ მიპატიებია ჩემი თავისთვის და ბატონ ბიძინას არ ვაპატიებ. 6 თვეში მივხვდი, რომ შეცდომა დავუშვი. მე მეგონა “ნაციონალების” კეთილ საქმეებს გააგრძელებდნენ და ამათ პირიქით, ცუდი წამოწიეს.
ყველაზე მძიმე დღეს, როდესაც ნიკას აყვანა მიმდინარეობდა, ვნერვიულობდი ხალხზე. მე მიყვარს ჩემი საქართველო. არ მეშინია. ამათ რომ ვლანძღავ, ყველა მეუბნება, გაჩერდიო. მე პატიოსნად ვმუშაობ, ნახონ, თუ რამეს დამიშავებენ, იქაც ავიმაღლებ ხმას და არ გავჩერდები.
როდესაც შვილს უკანონოდ მიპატიმრებენ და იარლიყებს აწებებენ, სულ მამაჩემის ხმა ჩამესმის ყურში – ანზორ, არასოდეს, ბოროტებას როცა გაგიკეთებენ, ბოროტებით არ უპასუხო, სიკეთით უპასუხეო… ღმერთი მათ დასჯისო. ნახეთ, ნიკას დამსჯელები როგორ დაისჯებიან”, – აღნიშნა მელიამ.
ცნობისათვის, ნიკა მელია „ნაციონალური მოძრაობის“ ოფისში 23 თებერვალს დააკავეს. მას გამოძიება 2019 წლის 20-21 ივნისის საპროტესტო აქციის დროს ჯგუფური ძალადობის ორგანიზებას, ხელმძღვანელობასა და მასში მონაწილეობას ედავება.