ახალი ამბები მთავარი პოლიტიკა სამართალი

“ნიკა მელიას ტელევიზორით სარგებლობის უფლება იმ შემთხვევაში ექნება, თუ პენიტენციური დაწესებულების მაღაზიაში შეიძენს” – პენიტენციური სამსახური

სპეციალური პენიტენციური სამსახურის მიერ გავრცელებული განცხადების თანახმად, “ნაცმოძრაობის” თავდომარეს, ნიკა მელიას სხვა პატიმრის მსგავსად, ტელევიზორით სარგებლობა გარკვეული ტექნიკური პროცედურების გავლის შემდეგ შეეძლება.

როგორც უწყების მიერ გავრცელებულ განცხადებაში ვკითხულობთ, ნიკა მელიას ისევე როგორც სხვა პატიმრებს, ტელევიზორით სარგებლობა მისი შეძენის შემთხვევაში შეუძლია.

„2020 წლის 23 თებერვალს საქართველოს სახალხო დამცველმა ნინო ლომჯარიამ, ბრალდებულ ნიკანორ მელიას პენიტენციურ დაწესებულებაში მონახულების შემდეგ მედიასთან გააკეთა განცხადება და აღნიშნა, რომ ბრალდებულს საკანში არ აქვს ტელევიზორი. მან იმედი გამოთქვა, რომ პენიტენციური დაწესებულების ადმინისტრაცია ამ ლოჯისტიკურ საკითხს დროულად მოაგვარებს. ამასთან დაკავშირებით სპეციალური პენიტენციური სამსახური განმარტავს, რომ ბრალდებულ ნიკანორ მელიას, ისევე როგორც პენიტენციურ სისტემაში მყოფ ნებისმიერ სხვა პატიმარს, ექნება ტელევიზორით სარგებლობის უფლება იმ შემთხვევაში, თუ იგი შეიძენს ტელევიზორს პენიტენციურ დაწესებულებაში არსებულ მაღაზიაში. ნებისმიერ პატიმარს, მათ შორის ნიკანორ მელიას, პენიტენციურ სისტემაში მოხვედრის შემდეგ უნდა დაუმზადდეს საბანკო ბარათი, რომლითაც ის შეძლებს პენიტენციური დაწესებულების მაღაზიაში ანგარიშსწორებას. ამისთვის პენიტენციური დაწესებულების ადმინისტრაცია პატიმრის მონაცემებს დადგენილი წესით აწვდის ბანკს, რაც დღეს უკვე გაკეთდა და რამდენიმე დღეში დამზადდება საბანკო ბარათი, ისევე როგორც ციხის გარეთ მყოფი სამოქალაქო პირის შემთხვევაში ხდება. სწორედ ამ პროცედურის გავლა არის საჭირო იმისთვის, რომ ბრალდებულმა შეძლოს ტელევიზორის შეძენა“,- ნათქვამია განცხადებაში.

ავიაბილეთები იაფად
იტვირთბა....