“ქართველების დროებით დასაქმებაზე გერმანიის შემდეგ მოლაპარაკებები საფრანგეთსა და ისრაელთან მიმდინარებს,” – ამის შესახებ ჯანდაცვის მინისტრობის კანდიდატმა, ეკატერინე ტიკარაძემ პარლამენტში, კომიტეტების ერთობლივ სხდომაზე სიტყვით გამოსვლისას განაცხადა.
მინისტრობის კანდიტატის განცხადებით, გარკვეული მოლაპარაკებები კვიპროსთანაც მიმდინარეობს.
“შემდეგი ქვეყნები, რომლებიც მოლაპარაკების რეჟიმში გვყავს, არის საფრანგეთი, საბერძნეთი და ისრაელი, თუმცა, კვიპროსთანაც მიმდინარეობს გარკვეული მოლაპარაკება”, – განაცხადა ტიკარაძემ.
ამასტან, როგორც ეკატერინე ტიკარაძემ სხდომაზე აღნიშნა, გერმანიასთან გაფორმებული ხელშეკრულების შემდეგ ქართველების დროებით დასაქმებაზე ევროპის არაერთმა ქვეყანამ გამოთქვა ინტერესი.
ცნობისთვის, პარლამენტში, კომიტეტების ერთობლივ სხდომაზე ჯანდაცვის მინისტრობის კანდიდატ ეკატერინე ტიკარაძეს უსმენდნენ
შეგახსენებთ, რომ საქართველოსა და გერმანიას შორის შეთანხმება დაიდო, რის საფუძველზეც ქართველები გერმანიაში დროებით დასაქმებას შეძლებენ. პორტალზე 24 საათში საქართველოს 35 121 მოქალაქე დარეგისტრირდა.
გერმანიის შრომის ბაზარზე, საქართველოს მოქალაქეებს დროებითი ლეგალური დასაქმება 3 თვით შეეძლებათ. სეზონური სამუშაოები 1 აპრილიდან დაიწყება.
დასაქმების მსურველი უნდა აკმაყოფილებდეს შემდეგ მოთხოვნებს:
- 18 წლიდან 60 წლამდე ასაკის საქართველოს მოქალაქე;
- გერმანიაში გამგზავრებამდე 3 თვით ადრე პერიოდში არ უმოგზაურია შენგენის სივრცეში;
- ფიზიკური ჯანმრთელობა;
- მოსავლის აღების სამუშაო გამოცდილება და მოტივაცია;
- ნებისმიერი მიზეზის (დარღვევის) არარსებობა, რაც იწვევს ქვეყანაში ხელახლა შესვლის შეზღუდვას;
- გერმანული ან ინგლისური ენის ელემენტარულ საკომუნიკაციო დონეზე ცოდნა (ჯგუფურად დასაქმების შემთხვევაში, აუცილებელია, მინიმუმ ერთ წევრს შეეძლოს გერმანულ ან ინგლისურ ენაზე კომუნიკაცია). ენის ცოდნის მოთხოვნას განსაზღვრავს დამსაქმებელი.
რეგისტრაცია შესაძლებელია მთელი წლის განმავლობაში პორტალზე: https://workabroad.moh.gov.ge/