“ის იყო ნაღდი პრემიერმინისტრი, თავისი უფლებებით, პასუხისმგებლობებით და საკუთარი პოლიტიკური კურსით!” – ამის შესახებ ყოფილი დეპუტატი, ხათუნა ხოფერია სოციალურ ქსელში წერს.
როგორც ხოფარია თავის პოსტში აღნიშნავს, გიორგი გახარია სამი წელი აპლოდისმენტებს იმსახურებდა.
“გახარია 3 წელი იყო ქართული ოცნების მეხამრიდი!
აი, ფეხბურთელი რომ მკერდით იღებს ბურთს, ზუსტად ასე იღებდა საკუთარ თავზე ყველა პოლიტიკურ, სოციალურ, პანდემიურ, ეკონომიკურ დარტყმას.
…და 3 წელი იმსახურებდა აპლოდისმენტებს.
ახლა, თუ დაგვაჯერეს, რომ ის იყო ნაცი, ქრთამისტი, გამყიდველი, ელისოს და პეტრეს პატრონი, მელიას დამცველი მილიონის სანაცვლოდ, მაშინ ეჭვქვეშ დგება ყველა მისი გადაწყვეტილება, მისი მინისტრთა კაბინეტის მიერ მიღებული ყველა საკითხი, მისი “გაპრავებული” არჩევნები”, მისი წარმოდგენილი და პარლამენტის მიერ ტაშით დამტკიცებული ბიუჯეტი, მისი მკერდით დაცული “ქართული ოცნება” და საერთოდ ყველაფერი, რაც მოხდა გახარიას პრემიერობის დროს!… იმიტომ, რომ ის არ იყო უბრალოდ, აღმასრულებელი ხელისუფლების სიმბოლური ხელმძღვანელი. ის იყო ნაღდი პრემიერმინისტრი, თავისი უფლებებით, პასუხისმგებლობებით და საკუთარი პოლიტიკური კურსით!
ასეთ პირობნებებს, განსაკუთრებით მაშინ, როდესაც თავად მიდიან, ტალახს არ ესვრიან! ასეთ ფიგურებს,როგორც ისტორია გვეუბნება, ან ლიდერად აქცევენ,.. ან კლავენ…
… და ერთიც, ისინი არასოდეს მიდიან იმისთვის, რომ აღარ დაბრუნდნენ!…” – წერს ხათუნა ხოფერია.
ინფორმაციისთვის, პრემიერ-მინისტრმა გიორგი გახარიამ თანამდებობა დატოვა. როგორც გახარიამ განმარტა, მას გაუმართლებლად მიაჩნია ნიკა მელიას დაპატიმრება იმ პირობებში, როდესაც არსებობს პოლიტიკური ესკალაციის საფრთხე.
“ქართულმა ოცნებამ” პრემიერ-მინისტრის თანამდებობაზე ირაკლი ღარიბაშვილის კანიდიდატურა წარადგინა.