ცნობილი მეცოსოპრანო ანიტა რაჭველიშვილი სოციალური ქსელის საშუალებით ქობულეთში, 14 წლის მოზარდის თვითმკვლელობის საქმეს ეხმაურება.
ანიტა რაჭველიშვილი “ფეისბუქით” გავრცელებულ პოსტში ამბობს, რომ ამ ასაკის ადამიანთან სქესობრივი კავშირის დამყარება ძალადობაა, რადგან ასეთ ასაკში არცერთი გოგო არ არის პასუხისმგებელი საკუთარ ქცევაზე.
“23 წლის ზრდასრული მამაკაცი თუ სექსუალურ კავშირს დაამყარებს 14 წლის გოგონასთან ეს ძ ა ლ ა დ ო ბ ა ა!!!! გაიგეთ და შეიგნეთ ხალხო რომ მაგ ასაკში არც ერთი გოგო არ არის საკუთარ საქციელზე პასუხისმგებელი და მანიპულაციის და ძალადობის ბევრი ფორმა არსებობს! თუ სიყვარულს აუხსნით და დაოჯახებას შეპირდებით სექსის გამო ეგეც მანიპულაცია და ძალადობაა! გული მერევა უკვე იმათზე ვინც ამ სიტუაციაში საერთოდ ნებაყოფლობით სექსზე საუბრობს და გოგოს ბიოლოგიურ სიმწიფეზე!
14 წლის ასაკში ნებაყოფლობითი სექსი არ არსებობს! ა რ ა! ცივილიზებულ ქვეყნებში მაგაზე ციხეა და არ აქვს მნიშვნელობა “სიყვარული” იყო თუ რომანტიული თავგადასავალი! მითუმეტეს ამ შემთხვევაში გოგომ გამაცხადა პოლიციაში და ამხილა მოძალადე,მერე კი უვარგისი საზოგადოების,ოჯახის და პოლიციის უმაქნისობის გამო თავი მოიკლა! ჩვენ რას ვაკეთებთ?
რაღაც მარაზმს განვიხილავთ! მთავრობა რას აკეთებს? როგორც ყოველთვის არაფერს!” – წერს მომღერალი.
ცნობისთვის, ქობულეთის მუნიციპალიტეტში მომხდარი თექვსმეტი წლის ასაკს მიუღწეველთან სექსუალური კავშირის დამყარებისა და თვითმკვლელობამდე მიყვანის ფაქტზე დაკავებულ ნ.ტ.-ს ბრალდება 12 თებერვალს წარედგინა.