ექსპრეზიდენტი, მიხეილ სააკაშვილი სოციალური ქსელით გავრცელებულ მიმართვაში საქართველოში უკრაინის ელჩს, იგორ დოლგოვს კორუმპირებულს უწოდებს.
სააკაშვილი აღნიშული მიმართვით უკრაინის ელჩის მიერ დღეს გაკეთებულ განცხადებას გამოეხმაურა და აცხადებს, რომ დოლგოვი „საბჭოთა ფუნქციონერია“.
„საქართველოში უკრაინის ელჩი, ბატონი დოლგოვი, რომელიც ოთხი წლის წინ პოროშენკომ დანიშნა ჩემ წინააღმდეგ ბრძოლის ერთადერთი მიზნით, გადარჩა ზელენსკის დროს და განაგრძობს საქართველოსა და მთელ პოსტსაბჭოთა სივრცეში უკრაინის იმიჯის შელახვას.
ეს სწორედ ის დოლგოვია, რომელიც პოროშენკოს გუნდთან უნისონში მუშაობდა, რომ უკრაინელი სახალხო დეპუტატები არ გამგზავრებულიყვნენ, როგორც დამკვირვებლები, საქართველოში გასული წლის ოქტომბრის არჩევნებზე.
დღეს ის მრისხანე რიტორიკით დამატყდა მე თავს იმის გამო, რომ მე ვიბრძვი ქართველი ხალხის თავისუფლებისთვის. თურმე, ეს აზიანებს ქართულ-უკრაინულ ურთიერთობებს.
უკვე მრავალი თვეა, ორი უკრაინელი კაპიტანი დიაჩენკო და ხომიჩი, ასევე უკრაინული წარმომავლობის ქართველი მიხაილ ბატურინი ჰყავს უკანონო ტყვეობაში ქართულ ხუნტას, რომელმაც, როგორც სომალელმა მეკობრეებმა, დაიჭირა ისინი ზღვაში და ცდილობს, რამე აღიარება გამოსძალოს. ბატონმა დოლგოვმა თითიც კი არ გაანძრია, რათა აღეკვეთა და შეეჩერებინა საქართველოს ხელისუფლების უკანონო ქმედებები და შემოიფარგლა მხოლოდ კონსულის ფორმალური გაგზავნით სხდომაზე და პროკურატურაში. ახლა ის ბედავს ამგვარი განცხადებების გაკეთებას.
ვეუბნები მას, როგორც საქართველოს ყოფილი პრეზიდენტი უკრაინის მოქალაქეს. მიმაჩნია, რომ ის ღრმად კორუმპირებულია. მიმაჩნია, რომ უკრაინის ინტერესების წინააღმდეგ მოქმედებს და მე ვიბრძოლებ იმისთვის, რომ ასეთი ელჩები არ ჰყავდეს არც უკრაინას და არც საქართველოში. მე ამ საქმეს ბოლომდე მივიყვან.
ჩემი ღრმა რწმენით, ეს ელჩი მექრთამე და კორუფციონერია, რომელსაც არაფერი აქვს საერთო უკრაინული ინტერესების დაცვასთან, როგორც ეს კარგად აჩვენა ოდესელი მეზღვაურების კონკრეტულმა შემთხვევამ და რომელიც უკვე დიდი ხანია, მჭიდროდ არის დაკავშირებული ქართველი ჩინოვნიკების მრავალ ადგილობრივ კორუმპირებულ ინტერესთან. სამწუხაროდ, ეს არ ეხება მხოლოდ უკრაინის ამ კონკრეტულ ელჩს, არამედ მთელ მსოფლიოში უკრაინის საკმაოდ ბევრ დიპლომატს, რაც უკრაინული დიპლომატიის ეფექტიანობის შემცირების, ასევე საერთაშორისო საზოგადოებაში უკრაინის პოზიციების დისკრედიტაციის და შესუსტების პირდაპირ პროპორციულია.
დოლგოვი მადანაშაულებს იმაში, რომ მე მოვუწოდებ ქართველ ხალხს პროტესტის გამოხატვისა და „უკანონო“ დემონსტრაციებისკენ და ეს ელჩი წარმოადგენს ქვეყანას, რომელმაც გადაიტანა ორი მაიდანი, რომლებზეც უკრაინელმა ხალხმა გამოხატა პროტესტი გაყალბებული არჩევნების წინააღმდეგ?! ის ჩვეულებრივი საბჭოთა ფუნქციონერია, რომელიც რატომღაც შეიპარა და მოხვდა მაიდანის შემდგომ უკრაინელ ჩინოსნებს შორის. ” – წერს მიხეილ სააკაშვილი სოციალურ ქსელში.
ცნობისთვის, საქართელოში უკრაინის ელჩმა, იგორ დოლგოვმა დღეს განაცხადა, რომ საქართველოს ყოფილი პრეზიდენტის, უკრაინის რეფორმების საბჭოს აღმასრულებელი კომიტეტის თავმჯდომარის, მიხეილ სააკაშვილის განცხდებაზე, რომ დაუმორჩილებლობის აქციები დიდი მასშტაბით არის გასაკეთებელი.
„ბუნებრივია, როგორც კონკრეტულ პირს, მას აქვს გამოხატვის უფლება, თუმცა ახლა, როცა საპარლამენტო არჩევნებთან დაკავშირებული სიტუაცია მეტ-ნაკლებად დარეგულირდა და ხდება ფოკუსირება მეტად მნიშვნელოვან საკითხებზე, დაუმორჩილებლობასა და კანონსაწინააღმდეგო მანიფესტაციებთან დაკავშირებით მოწოდებები ნამდვილად არ დაგვეხმარება“, – განაცხადა უკრაინის ელჩმა, იგორ დოლგოვმა მიხეილ სააკაშვილის განცხადებასთან დაკავშირებით.