“სულ სხვა სახის დაცინვაა, წაიყვანო და ჩინოვნიკის საპირფარეშო ახეხინო” – თამარ ჩერგოლეიშვილი ჩხოროწყუში მომხდარ ფაქტს ეხმიანება

“ტაბულას” დამფუძნებელი და მთავარი რედაქტორი, თამარ ჩერგოლეიშვილი სოციალურ ქსელში ჩხოროწყუში მომხდარ ფაქტთან დაკავშირებით წერს.

“მეტრონომი” მთავარი რედაქტორის “ფეისბუქ” მიმართვას უცვლელად ტავაზობთ.

“ის, რომ ბავშვები სკოლამ დასუფთავებას და გარემოს მოვლას მიაჩვიოს – ნორმალური კი არა, სასურველია.

ჩემი ყველა მეზობელი გაიხსენებს, რომ თვეში ერთხელ, შაბათს, ბებიაჩემი ჩვენ (შვილიშვილებს) და მეზობლის ბავშვებს გვკრებდა და ეზოს ვალაგებდით – წლების განმავლობაში.

(ბებია ეთნიკურად ოსი იყო, მაგრამ ბევრ ეთნიკურ ქართველზე მეტად ალამაზებდა ამ ქვეყანას).

ახლაც, კამპანიის დროს – საღამოობით ღონისძიებას რომ ვაწყობდით ფოთის კორპუსებში, ჯერ ეზოს ლაგებით ვიწყებდით – იქაურ ბავშვებთან ერთად.

ერთია, ბავშვს საკუთარ გარემოზე ზრუნვა ასწავლო, რომ მთავრობას არ ელოდოს, როდის დაულაგებს ეზოს.

მაგრამ სულ სხვა სახის დაცინვაა, წაიყვანო და ჩინოვნიკის ტუალეტი ახეხინო – ეს არის ბავშვის დამცირება და ღირსების შელახვა.” – წერს ჩერგოლეიშვილი.

შეგახსენებთ, გუშინ, ინტენეტში გავრცელდა კადრები, თუ როგორ ასუფთავებინებდნენ ჩხოროწყუს ერთ-ერთი სკოლის მოსწავლეებს მერიის შენობის საპირფარეშოს.

ცნობისთვის, ჩხოროწყუში მომხდარ ფაქტზე შინაგან საქმეთა სამინისტრომ გამოძიება დაიწყო. არსებული ინფორმაციით, რამდენიმე დღის წინ ჩხოროწყუს მუნიციპალიტეტის დასუფთავების სამსახურის ყოფილმა თანამშრომელმა, ერთ-ერთი სკოლის დირექციის თანხმობით, მოსწავლეები „დასუფთავების აქციაზე“ წაიყვანა.