ზუგდიდში, ახალგაზრდა მამაკაცის გარდაცვალებასთან დაკავშირებით ახალი დეტალები ხდება ცნობილი.
როგორც შინაგან საქმეთა სამინისტროს მიერ გავცელებულ განცხადებაში ვკითხულობთ, გარდაცვლილსა და მკვლელობაში ეჭვმიტანილს შორის დაპირისპირება ურთიერთშელაპარაკების ნიადაგზე დაიწყო.
აღნიშნულის შემდეგ კი მკვლელობაში ბრალდებულმა პირმა გარდაცვლილს სასიკვდილო ჭრილობა მიაყენა. რის შემდეგ, კვალის დაფარვის მიზნით 39 წლის მამაკაცის საცხოვრებელ სახლში ხანძარი განზრახ გააჩინა.
უწყების ინფორმაციით, სამართალდამცავებმა ოპერატიული მუშაობის შედეგად დანაშაული ცხელ კვალზე გახსნა. მათივე ცნობით, აღნიშნული დანაშაული 7-დან 15 წლამდე ვადით თავისუფლების აღკვეთას ითვალისწინებს.
“გამოძიებით დადგინდა, რომ ბრალდებულმა ზუგდიდში, ურთიერთშელაპარაკების შემდეგ, შურისძიების მოტივით, ნაცნობს – 1983 წელს დაბადებულ მამაკაცს ცივი იარაღით სხეულზე სასიკვდილო ჭრილობები მიაყენა, რის შემდეგაც, დანაშაულის კვალის დაფარვის მიზნით, ბინაში, სადაც შემთხვევა მოხდა ხანძარი გააჩინა და მიიმალა.
შინაგან საქმეთა სამინისტრომ შეტყობინება მიიღო ზუგდიდის ერთ-ერთ საცხოვრებელ კორპუსში ხანძრის შესახებ. შემთხვევის ადგილზე მისულ სამართალდამცველებს უკვე გარდაცვლილი დახვდათ 1983 წელს დაბადებული ვ.ვ., რომელსაც, პირველადი დათვალიერებით, სხეულზე სხვადასხვა დაზიანება აღენიშნებოდა.
პოლიციამ, ცხელ კვალზე ჩატარებული ოპერატიული და საგამოძიებო ღონისძიებების შედეგად, ბრალდებული მომხდარიდან რამდენიმე საათში, ზუგდიდში დააკავა. დანაშაულის ჩადენის იარაღი – დანა ამოღებულია ნივთმტკიცების სახით.
დაკავებული დანაშაულს აღიარებს.
განზრახ მკვლელობის ფაქტზე გამოძიება საქართველოს სისხლის სამართლის კოდექსის 108-ე მუხლით მიმდინარეობს,”- ნათქვამია განცხადებაში.