“ვერანაირი ისფედები და მისფედები ამას ვერ შეცვლიან” – ნათელაშვილი “სამართლიანი არჩევნების” შესახებ

“ვერანაირი „ისფედები“ და „მისფედები“ ამას ვერ შეცვლიან, ვერ დააზუსტებენ, ვერ გადახრიან და გაალამაზებენ,” – აღნიშნული განცხადება “ლეიბორისტული პარტიის” ლიდერმა, შალვა ნათელაშვილმა დღეს მედიასთან საუბრისას განაცხადა.

როგორც ნათელაშვილი ჟურნალისტებთან საუბრისას განმარტავს, ამ რეალობაზე არც ერთი მხარე არ საუბრობს.

„ამ რეალობას არც ერთი მხარე არ ამბობს და რაღაც გაუგებარი არგუმენტებით აბეზრებენ თავს საზოგადოებას. არჩევნების შედეგები იზომება ამომრჩევლების განწყობით და იზომება 3 700 უბანზე და რაც ამ უბნებზე მოხდა, ეს იყო სამოქალაქო ომი საკუთარი ხალხის წინააღმდეგ. ვერანაირი „ისფედები“ და „მისფედები“ ამას ვერ შეცვლიან, ვერ დააზუსტებენ, ვერ გადახრიან და გაალამაზებენ.

მე მთელი გულახდილობით მოგახსენებთ, რომ „ისფედის“ სახელი გავიგე პირველად ელჩებთან მოლაპარაკებების დროს, როდესაც ბატონმა, ირაკლი კობახიძემ მოითხოვა, რომ მათი დათვლილი ოქმების მიხედვით, გადაგვეწყვიტა არჩევნების ბედი და საკითხი. ჩემთვის იყო მაშინაც ეს გაუგებარი და პირდაპირ დავუფიქსირე, რომ არჩევნები გაყალბდა და ვერანაირი „ისფედი“ და მისი პროცენტული მონაცემები ამ საკითხს ვერც გააუმჯობესებს, ვერც შეცვლის, ვერც ძველებურად დატოვებს“, – განაცხადა ნათელაშვილმა.