გაირკვია 1-ელ დეკემბერს „თბილისის ზღვის ჰოსპიტალის“ დაყაჩაღებაში ბრალდებულთა ვინაობა. სამედიცინო დაწესებულებაში, სადაც კოვიდინფიცირებულებს მკურნალობენ ორი შეიარაღებული პირი შეიჭრა და 3500 ლარი გაიტაცა.
თავდამსხმელები შინაგან საქმეთა სამინისტრომ დღეს დააკავა. ჩვენი ინფორმაციით, დაკავებულები არიან 36 წლის ვასილ ნანიაშვილი და 47 წლის იმედა წიკლაური. დაკავების შესახებ ინფორმაცია ვარკეთილში, იმედა წიკლაურის მეზობლებმა დაადასტურა. მათი თქმით, მეორე დაკავებული ვასილ ნანიაშვილი წიკლაურის სახლში ცხოვრობდა, თუმცა ბოლო დღეებში არცერთი მათგანი აღარ შეუნიშნავთ.
კოვიდკლინიკაზე ყაჩაღური თავდასხმის ამსახველი კადრებით ცნობილი ხდება, რომ დამნაშავეები „ტტ“-ს სისტემის პისტოლეტითა და სანადირო თოფით იყვნენ შეიარაღებულნი. მათ კლინიკის დაცვის თანამშრომელმა წინააღმდეგობა გაუწია, თუმცა თავდამსხმელებმა იარაღიდან გასროლის შემდეგ, კლინიკაში შესვლა მაინც მოახერხეს და რამდენიმე წამში მიმღების სალაროდან 3500 ლარი გაიტაცეს და გაიქცენენ.
„სამართალდამცველებმა, ინტენსიური ოპერატიულ-საგამოძიებო მოქმედებების შედეგად, ყაჩაღურ თავდასხმაში მონაწილე პირები მომხდარიდან ორ დღეში დააკავეს“ – აღნიშნულია შსს-ს განცხადებაში.
გამოძიება საქართველოს სისხლის სამართლის კოდექსის 179-ე მუხლის მე-2 ნაწილის „ბ“ ქვეპუნქტით მიმდინარეობს, რაც ჯგუფურად ჩადენილ ყაჩაღობას გულისხმობს. დანაშაული ექვსიდან ცხრა წლამდე ვადით თავისუფლების აღკვეთას ითვალისწინებს.
წყარო: “პრაიმტაიმი”
