მცხეთის რაიონულ სასამართლოში დღეს გიორგი შაქარაშვილის განზრახ მკვლელობის საქმეზე ბრალდებული ხუთი პირის პროცესი გაიმართება.
დღევანდელ სხდომაზე დაცვის მხარე შესავალი სიტყვით წარდგება.
როგორც ადვოკატი ბექა ნემსიწვერიძე ამბობს, ასევე დღევანდელ პროცესზე შესაძლებელია, ბრალდების მხარემ რამდენიმე მოწმე წარმოადგინოს.
“წინა პროცესზე ჩვენ მოვისმინეთ ბრალდების მხარის შესავალი სიტყვა. იქ ფაქტობრივად საუბარი არ ყოფილა მკვლელობაზე. ძირითადად პროკურორი საუბრობდა მანქანების გადაადგილებაზე და თუ ვინ სად იმყოფებოდა. ეს არ არის გასაკვირი გამომდინარე იქიდან, რომ ვთვლით, ალბათ თავად ბრალდების მხარესაც არ სჯერა იმ აბსურდული ბრალდების, რაც ამ ხუთ პირს მათ წარუდგინეს. ისინიც დარწმუნებულები არიან, რომ ამ ადამიანებს არანაირი შემხებლობა არ აქვთ იმ დანაშაულთან, რის ჩადენასაც ისინი მათ ედავებიან.
დღევანდელ პროცესზე ასევე შესაძლებელია, ბრალდების მხარემ წარმოადგინოს რამდენიმე მოწმე, თუმცა ეს ჩვენთვის ჯერ არ არის ცნობილი. დეტალურად ვიცნობთ მათი გამოკითხვის ოქმებს. არც ერთი მათგანი არ საუბრობს მკვლელობაზე. შესაბამისად გვაქვს მოლოდინი, რომ ისინი ალბათ ისაუბრებენ იმ გარემოებებზე, რაზეც საუბრობდნენ თავიანთ გამოკითხვის ოქმებში. არანაირი მოლოდინი იმისა, რომ რომელიმე რაიმე ისეთ გარემოებაზე ისაუბრებს, რაც ბრალდების მხარეს დაეხმარებოდა ბრალის დადასტურებაში, ჩვენ არ გვაქვს“, – განაცხადა ადვოკატმა ბექა ნემსიწვერიძემ.
შეგახსენებთ, ამ დროისთვის საქმეზე დაკავებულია 17 პირი. პროკურატურამ შაქარაშვილის საქმეზე 5 პირს განზრახ მკვლელობის მუხლით ბრალი დაუმძიმდა. აღნიშნული 5 პირი, რომელთაც ბრალი ჯგურუფად ჩადენილი განზრახ მკვლელობის მუხლით დაუმძიმდათ, “ტოიოტა ქამრის” მგზავრები – ვახტანგ ჩიქოვანი, არჩილ გაგნიძე, ნიკოლოზ რევაზიშვილი, არასრულწლოვნები ა.ქ. და ზ.ხ. არიან. დანაშაულის დამტკიცების შემთხვევაში ბრალდებულებს 13-დან 17 წლამდე პატიმრობა ემუქრებათ.