19 წლის გარდაცვლილი ფეხბურთელის მკვლელობის საქმე 13-დან 17 ტომამდე გაიზარდა. ახალ მასალებში გიორგი შაქარაშვილის შესახებ დამატებითი ჩვენებები და მტკიცებულებები დევს, თუმცა, გახდება თუ არა ეს საკმარისი დაკავებულებისათვის ბრალის დასამძიმებლად, უცნობია. რა მოხდა საბედისწერო ღამეს არაგვის ხიდის მიმდებარედ – ამ საკითხზე ჩხუბში მონაწილეები, მათ შორის, შაქარაშვილის მეგობრები ამ დრომდე არ საუბრობენ.
დასკვნის გამოქვეყნებისა და პროკურატურის მიერ მუხლის დაზუსტების შემდეგ, გამოძიება დამამძიმებელ გარემოებებში ჯგუფურად ჩადენილი განზრახ მკვლელობის საქმეზე გრძელდება.
ვინ მოკლა 19 წლის ფეხბურთელი – პროკურატურამ ახლა ამ კითხვას უნდა გასცეს პასუხი. ოჯახის ვერსიით, გიორგი ცემის შემდეგ თავდამსხმელებმა წყალში ჩააგდეს. კიდევ ერთი ანალიზი, რომელმაც საქმეში ერთ-ერთ ბუნდოვან ეპიზოდს უნდა მოჰფინოს ნათელი, ჩანთაზე დნმ-ია. როგორ აღმოჩნდა გიორგი შაქარაშვილის ჩანთა ხიდის ბეტონის ჯებირზე, ამ დრომდე უცნობია, ანალიზმა უნდა აჩვენოს, ვინ შეეხო გარდაცვლილი ახალგაზრდის გარდა შავი ფერის ჩანთას.
შაქარაშვილის ოჯახი მიიჩნევს, რომ დამამძიმებელ გარემოებებში ჯგუფურად ჩადენილი განზრახ მკვლელობისათვის პასუხი უნდა აგოს ნაძალადეველების იმ ექვსეულმა, რომელიც არაგვის ხიდთან ჩხუბში “ტოიოტა კამრის” მარკის ავტომობილით, მერსედესის შემდეგ მივიდა. სწორედ ამ ახალგაზრდებმა ნახეს ბოლოს გიორგი ცოცხალი.
ამ ეპიზოდში აგარაკზე ნაცემი ჩიქოვანი, მორაგბეები მახარაძე და გაგნიძე, ნიკა რევაზიშვილი, აკაკი ქვრივიშვილი და არასრულწლოვანი ზ.ხ. მონაწილეობდნენ. ადვოკატები მათი დაცვის ქვეშ მყოფებისათვის ბრალის დამძიმებას არსებული მტკიცებულებების საფუძველზე გამორიცხავენ.