პარლამენტის შენობასთან ტელეკომპანია “მთავარი არხის” ერთერთი მეწილის, პატიმარ გიორგი რურუას მხარდამჭერები და სამოქალაქო მოძრაობა „სირცხვილია” აქციას მართავენ.აქციის მონაწილეები მოითხოვენ, რომ „ქართული ოცნების“ ხელისუფლებამ შეასრულოს საარჩევნო საკითხებზე ოპოზიციასთან 8 მარტს მიღწეული შეთანხმება და გიორგი რურუა პატიმრობიდან გაათავისუფლოს. წინააღმდეგ შემთხვევაში პარლამენტთან მიმდინარე აქციის მონაწილეები პერმანენტულ აქციებს აანონსებენ. ამის შესახებ მოძრაობის ერთ-ერთმა წევრმა, ნიკა ფარულავამ ჟურნალისტებთან საუბრის დროს განაცხადა.
„ივანიშვილმა უნდა გამოიჩინოს მისთვის უცნობი პოლიტიკური გონიერება და მიიღოს საკონსტიტუციო ცვლილება. ასევე, რაც ყველაზე მთავარია, უნდა გამოუშვას გიორგი რურუა, რადგან 8 მარტის შეთანხმების იმპლემენტაციისთვის საჭიროა ორივე ნაწილის შესრულება. ჩვენი აქციის ფონზე ისმის ბიძინა ივანიშვილის ერთ-ერთი ინტერვიუდან ამონარიდი, როდესაც ის ამბობს, რომ თითქოს შექმნის ისეთ დემოკრატიას, რომლითაც ევროპასაც გააოცებდა. გაგვაოცოს დღეს, გამოიჩინოს გონიერება და ევროპის გაოცებამდე მისი მოსახლეობა გააოცოს,” – განაცხადა ნიკა ფარულავამ.
შეგახსენებთ, რომ ცეცხლსასროლი იარაღის მართლსაწინააღმდეგო შენახვა-ტარების ბრალდებით გიორგი რურუა 2019 წლის 18 ნოემბერს დააკავეს.