პრემიერ-მინისტრის, გიორგი გახარიას განცხადებით, დამამთავრებელი სკოლის მოსწავლეები სასწავლო წელს 20 მაისს დაასრულებენ, პირველკლასელები კი – 27 მაისს.
ამის შესახებ გიორგი გახარიამ განათლების ანტიკრიზისული გეგმის წარდგენისას განაცხადა.
პრემიერმა კიდევ ერთხელ დააკონკრეტა, რომ 2019-2020 სასწავლო წელი აკადემიურად არ გამოცხადდება.
“2019-2020 სასწავლო წელი აკადემიურად არ გამოცხადდება. საქართველოში სასწავლო წელი დისტანციურად, ონლაინ, ტელესკოლის საშუალებით ჩატარდა ჩვეულებრივად, ნორმალურ რეჟიმში. მე-12 კლასელები სასწავლო წელს დაასრულებენ 20 მაისს, პირველკლასელები 27 მაისს, დანარჩენი მოსწავლეები 15 ივნისს”, – განაცხადა პრემიერმა.
ამასთან, როგორც გახარიამ აღნიშნა, საქართველოში ეროვნული გამოცდები ჩვეულ რეჟიმში ჩატარდება და მათი თარიღი ივნისში გახდება ცნობილი.