ეკონომიკისა და მდგრადი განვითარების სამინისტროს ცნობით, სამკერვალო საწარმოები მზად არიან, აქტიურ რეჟიმში დაიწყონ პირბადეების წარმოება.
სამინისტროს მიერ გავრცელებული ინფორმაციის თანახმად, ეკონომიკის მინისტრი ნათია თურნავა სამკერვალო სექტორის წარმომადგენლებს შეხვდა, შეხვედრის მთავარი თემა კი, პირბადეების აქტიურ რეჟიმში წარმოების დაწყება იყო.
უწყების ცნობით, კომპანიების ხელმძღვანელებმა გამოთქვეს მზადყოფნა, რომ კორონავირუსის წინააღმდეგ ბრძოლაში, საპრევენციო ღონისძიებების განხორციელებაში მაქსიმალური ძალისხმევითა და რესურსებით გვერდით დაუდგებიან სახელმწიფოს და საკუთარ მოქალაქეებს.
„იმის გამო, რომ დღეს საქართველოში პირბადე და სხვადასხვა სადეზინფექციო საშუალება გარკვეულ პრობლემად რჩება, ჩვენ, როგორც სოციალური პასუხისმგებლობის მქონე კომპანია, მზად ვართ, ამ პროცესში აქტიურად ჩავერთოთ და პირბადეების გარკვეული ნაწილი უსასყიდლოდ შევთავაზოთ სახელმწიფოსა და საქართველოს მოსახლეობასა“, – განაცხადა შეხვედრის დასრულების შემდეგ კომპანია „აჭარა ტექსტილის“ წარმომადგენელმა, გიორგი ლომინაძემ.
ახალი კორონავირუსის წინააღმდეგ დაგეგმილი ღონისძიებების ფარგლებში სახელმწიფოს მხარდაჭერის მზაობა კომპანიამ „მოვიმაც” გამოხატა.
„დღეს მინისტრმა გააკეთა განცხადება, რომ შეზღუდვები არ დაწესდება ლოგისტიკასთან დაკავშირებით, ჩვენ მაქსიმალურად ვდგავართ სახელმწიფოს გვერდით და ამისკენ მოვუწოდებთ სხვა მწარმოებლებსაც“, – განაცხადა ანა ანდრონიკაშვილმა.
ფარმაცევტული კომპანია „სმარტ ფარმის“ განცხადებით, კომპანია მზად არის, მარლის არსებული ნაშთი უფასოდ პირბადეების წარმოებისთვის სახელმწიფოს გადასცეს.
„ჩვენმა კომპანიამ გამოთქვა სურვილი, რომ მარლის არსებული ნაშთი გადასცეს სახელმწიფოს უფასოდ, რათა შეუფერხებლად განხორციელდეს პირბადეების წარმოება. მომდევნო ეტაპზე, მომდევნო მოწოდებასთან დაკავშირებით, ჩვენ მზად ვართ, მაქსიმალურად ვიყოთ ჩართული, რომ შეუფერხებლად მოხდეს მარლის იმპორტი და მიწოდება იმ წარმოებისთვის, რომლებიც მზად არიან და გამოხატეს პასუხისმგებლობა, რომ ჩაერთონ წარმოებაში და მხარში დაუდგნენ სახელმწიფოს“, – აღნიშნა „სმარტ ფარმის“ წარმომადგენელმა, თეა მგალობლიშვილმა.
