„ევექსი ჰოსპიტლები“, საჭიროების შემთხვევაში მზად არის, ოთხი ჰოსპიტალი გამოყოს. ამის შესახებ კომპანია განცხადებას ავრცელებს.
„ქვეყნის ყველაზე დიდი ჰოსპიტალური ქსელი „ევექსი ჰოსპიტლები“ იზიარებს პასუხისმგებლობას, რაც კერძო სექტორს შექმნილ ვითარებაში გააჩნია და სახელმწიფოს სრულ მხარდაჭერას უცხადებს.
„ევექსი ჰოსპიტლები“ კორონავირუსის მასშტაბურად გავრცელების შემთხვევაში მზად არის, თბილისში, იმერეთსა და სამეგრელოში ოთხი სამედიცინო დაწესებულება გამოყოს, სადაც მხოლოდ დაინფიცირებული და სავარაუდოდ დაინფიცირებული პაციენტების მკურნალობა განხორციელდება.
პირველი ეტაპისთვის ორი ჰოსპიტალი უკვე სრულ მზადყოფნაშია და აღჭურვილია შესაბამისი ინფრასტრუქტურით: ხელოვნური სასუნთქი აპარატებით, სამკურნალო და საკარანტინე სივრცეებით. აღნიშნულ ჰოსპიტლებში გამოყოფილი იქნება 67 იზოლირებული პალატა, 28 საკარანტინე სივრცე, პირველი და მესამე დონის 36 ინტენსიური პალატა. საჭიროების შემთხვევაში, ჰოსპიტლები შეძლებენ, პროექტის ინიცირებიდან სამი დღის ინტერვალში მიიღონ და შესაბამისი სამედიცინო მომსახურება გაუწიონ დაინფიცირებულ და სავარაუდოდ დაინფიცირებულ პაციენტებს. ვირუსით დაინფიცირებულთა რაოდენობის მატების შემთხვევაში კი, კომპანია მზად არის, დამატებით კიდევ ორი ჰოსპიტალი გამოყოს, სადაც ინტენსიური პალატების ჩათვლით საწოლფონდების ჯამური რაოდენობა 120-ია.
„ევექსი ჰოსპიტლების“ კლინიკური გუნდი აწარმოებს მასშტაბურ სამუშაოებს და სრულად იცავს ჯანმრთელობის მსოფლიო ორგანიზაციის რეკომენდაციებს. ინტენსიური თერაპიისა და გადაუდებელი დახმარების განყოფილების ყველა ექიმს უკვე ჩაუტარდა ტრენინგი ვირუსთან ბრძოლის გაიდლაინების მიხედვით.
„ევექსი ჰოსპიტლები“ ქვეყნის ყველაზე მძლავრი ჰოსპიტალური ქსელია. ჩვენ ვგრძნობთ მაღალ პასუხისმგებლობას მოქალაქეებისა და ჩვენი პაციენტების წინაშე და ქვეყანაში შექმნილი მდგომარეობის დაძლევაში სახელმწიფოს მაქსიმალურად მხარს დავუჭერთ“, – აღნიშნულია კომპანიის მიერ გავრცელებულ განცხადებაში.
შეგახსენებთ, საქართველოში, ამ დროისთვის, ახალი კორონავირუსით ინფიცირების 25 შემთხვევაა დაფიქსირებული.