საქართველოს გენერალურ პროკურორად დანიშნული ირაკლი შოთაძის, „სილქნეტში“ საქმიანობის შესახებ, კომპანია განცხადებას ავრცელებს.
აღნიშნულ განცხადებას “მეტრონომი” უცვლელად გთავაზობთ:
„ბოლო პერიოდში მასმედიის საშუალებებით გაჟღერდა კითხვები სს „სილქნეტთან“ მიმართებით, რომელიც ეხებოდა ბატონ ირაკლი შოთაძის საქმიანობას ჩვენს კომპანიაში.
საზოგადოებრივი ინტერესიდან გამომდინარე, გვსურს აღვნიშნოთ შემდეგი:
ირაკლი შოთაძეს სს „სილქნეტის“ იურიდიული კონსულტანტის პოზიციაზე შრომითი ხელშეკრულება გაუფორმდა 2019 წლის 15 თებერვლიდან, რამდენიმე თვის შემდეგ, რაც მან დატოვა საქართველოს გენერალური პროკურორის თანამდებობა და მუშაობდა სილქნეტში 2020 წლის თებერვლამდე. ირაკლი შოთაძესთან შრომითი ხელშეკრულების გაფორმება მოხდა იმის გამო, რომ მას გააჩნდა მაღალი პროფესიული კვალიფიკაცია, რათა გაეწია კომპანიისთვის კონსულტაციები ისეთი იურიდიული საკითხების თაობაზე, რაც სილქნეტისთვის და ზოგადად სატელეკომუნიკაციო სექტორში მომუშავე კომპანიებისთვის წლების განმავლობაში პრობლემურ საკითხს წარმოადგენდა. ეს მოიცავს სატელეკომუნიკაციო სექტორის რეგულირების სამართლებრივ საკითხებს, ბაზარზე სხვადასხვა უკანონო ქმედებებთან ეფექტიანი ბრძოლის სამართლებრივ გზებს, მათ შორის, საავტორო უფლებების დარღვევის, ასევე ტელე და ინტერნეტ სივრციდან უკანონო და პირატული კონტენტის აღმოფხვრის მიმართულებით. მისი, როგორც სახელმწიფო სექტორში მოღვაწე იურისტის, ხანგრძლივი გამოცდილება სასარგებლო იყო კომპანიისთვის ამ საკითხების ეფექტიანად გადასაჭრელად. ბატონ შოთაძესთან ხელშეკრულების გაფორმების შესახებ გადაწყვეტილების მიღებამდე მოხდა მისი შეხვედრა და გასაუბრება სამეთვალყურეო საბჭოს წევრებთან, მათ შორის საბჭოს დამოუკიდებელ წევრთან, ბატონ თედ ჯონასთან, რომელიც ასევე გამოცდილი და პატივცემული იურისტია. ირაკლი შოთაძის კვალიფიკაციის, გამოცდილებისა და ცოდნის გათვალისწინებით, ვინაიდან არ არსებობდა რაიმე პრინციპული წინააღმდეგობა ბატონი შოთაძის დაქირავებისთვის კომპანიის სამართლებრივი საკითხების კონსულტანტად, კომპანიამ მიიღო მისი სამსახურში მიღების გადაწყვეტილება და კმაყოფილი დარჩა მის მიერ შესრულებული სამუშაოთი“, – ნათქვამია „სილქნეტის“ განცხადებაში.