დონორთა ყოველწლიური ფორუმის პარალელურად, რომელიც ავლაბარში სახელმწიფო ცერემონიების სასახლეში მიმდინარეობს, მოძრაობა “შეცვალეს“ და „სირცხვილიას“ წარმომადგენლებმა საპროტესტო აქცია გამართეს.
აქციის მონაწილეები ცერემონიების სასახლის ჭიშკარზე ბანერის გაკვრას ცდილობდნენ, რისი საშუალებაც მათ პოლიციამ არ მისცა.
აღნიშნულ ფაქტს აქციის მონაწილეებსა და სამართალდამცველებს შორის სიტყვიერი დაპირისპირება მოჰყვა.
შეკრებილების თქმით, სამართალდამცველები მათ სამოქალაქო პროტესტის გამოხატვაში ხელს უშლიან.
მოგვიანებით, აქციის მონაწილეებმა ბანერი წარწერით, “ამ სისტემის დედაც“ გზაზე გაშალეს.
დონორთა ყოველწლიური ფორუმი საქართველოს პრემიერ-მინისტრმა გახსნა.
შეგახსენებთ, რომ ღონისძიებას საქართველოს მთავრობის წევრები, პარლამენტის თავმჯდომარე, დეპუტატები, საქართველოში აკრედიტებული დიპლომატიური კორპუსის ხელმძღვანელები და დონორი ორგანიზაციების წარმომადგენლები ესწრებოდნენ.
ფოტო: პირველი არხი