ახალი ამბები ინტერვიუ მთავარი პოლიტიკა სამართალი

„ჩემს წინააღმდეგ ტროლების მიერ ჩატარებულმა ექსპერიმენტმა არ გაამართლა“

ექსკლუზიური ინტერვიუ „ქართული ოცნების“ ყოფილ აქტიურ წევრ, ოთო აბესაძესთან

 “ქართული ოცნების” ერთ დროს აქტიურ პოლიტიკური ფიგურას, ოთარ აბესაძეს, რომელიც თავის დროზე ქრთამის აღების ბრალდებით ზარ-ზეიმით დააკავეს, მუხლი გადაუკვალიფიცირდა ნაკლებად მძიმე დანაშაულზე, რაც ზეგავლენით ვაჭრობას გულისხმობს. ანუ, გამოდის, რომ ქრთამის აღების ფაქტი მას არ დაუმტკიცდა. ბუნებრივია, გაჩნდა გარკვეული კითხვები, თუ რა მოხდა, რეალურად. რამ გამოიწვია საქმის ასეთი რადიკალური შემობრუნება? „მეტრონომი“ დაუკავშირდა ოთარ აბესაძეს და ინტერვიუ თხოვა. როგორც ის ამბობს, ციხიდან გამოსვლის შემდეგ, პოლიტიკურ თემაზე, ეს მისი პირველი ინტერვიუა.

„მეტრონომი“: ოთო, პირველ რიგში გილოცავ სასამართლოს ასეთ ვერდიქტს. ანუ ეს ნიშნავს, რომ სასამართლომ ქრთამის ნაწილში გაგამართლა. ანუ, მან თქვა რომ შენ ქრთამი არ აგიღია. როგორი იყო შენი ემოცია, რეაქცია და რა იქნება შენი პირველი ნაბიჯი ამ ყველაფრის შემდეგ?

ოთო აბესაძე: პირველ რიგში დიდი მადლობა. ჩემთვის სასიცოცხლოდ მნიშვნელოვანი იყო, რომ მომშორებოდა ეს უსამართლოდ მოკერებული იარლიყი და მარაზმი, რაც იყო ქრთამი, მით უმეტეს მაშინ, როცა  21-ე საუკუნეში, ადამიანს აქვს ამბიციები შევიდეს აუდიტორიაში და ესაუბროს სტუდენტებს, მომავალ თაობას. 2-წლიანი ბრძოლა დამჭირდა იმისთვის, რომ ეს ჩირქი მოშორებოდა ჩემს სახელს.

ეს იყო მნიშვნელოვანი, ეს საშინელი იარლიყი ქრთამი არ ყოფილიყო დაკავშირებული ჩემს გვართან და ამან უფრო მეტი სტიმული მომცა სტუდენტებთან ურთიერთობაში, რომელიც შემოფარგლულია ფინანსების, ეკონომიკის და სტატისტიკის სწავლებაზე.

„მეტრონომი“: რა იყო და სად იყო ის წითელი ხაზი სასამართლო პროცესზე, როცა ქრთამის ბრალდებით დაწყებული საქმე რადიკალურად შეიცვალა და მივიღეთ უსამართლოდ დადანაშაულებული ოთო აბესაძე? რა არგუმენტმა გადაწყვიტა ეს?

ოთო აბესაძე: ეს გადაწყვიტა მტკიცებულებების ერთობლიობამ და გამოკვლევამ. მინდა დავიწყო ცოტა შორიდან, ძალიან ცუდად მოხდა ის, რომ მომენტალურად დავინიშნე დამნაშავედ და ფაქტობრივად, კორუფციის სახედ გამოვცხადდი 2017 წლის 11 ივლისს. გული დამწყდა, როცა ჩემთვის საკმაოდ მნიშვნელოვანმა და საპატივცემულო ადამიანებმა, ერთბაშად დამნიშნეს დამნაშავედ, რომ თითქოს საქართველოში კორუფციის ზღვარი გადის ჩემზე. ჩემთვის ეს იყო მთავარი ტრაგედია, მაშინ, როცა მთელი ჩემი ცხოვრება და მსოფლმხედველობა აგებული იყო მსგავს ფენომენთან ბრძოლაზე.

„მეტრონომი“: სასამართლო ვერდიქტის შემდეგ თუ დაგიკავშირდა ვინმე „ოცნებიდან“, ძველი მეგობრები, ბოლომდე ერთგულები, თუგინდ ისინიც, რომლებიც უშუალოდ მონაწილეობდნენ შენს „პოლიტიკურ ჩაწიხლვაში“?

ოთო აბესაძე: სამწუხაროდ უნდა აღვნიშნო, რომ ჩემი ყოფილი თანაგუნდელების თუ მეგობრების უმრავლესობა მონაწილეობდა ჩემს როგორც თქვენ აღნიშნეთ, „ჩაწიხლვაში“. ალბათ 2, 3, ან 4 ადამიანი შეიძლება იყოს, ვინც ბოლომდე დამიდგა მე და ჩემს ოჯახს გვერდით.

„მეტრონომი“: სასამართლომ თქვა, რომ შენ ქრთამი არ აგიღია. ანუ გამოდის, რომ შენ ხარ უსამართლობის მსხვერპლი. მინდა დაგისვა ალბათ, ერთ-ერთი მთავარი კითხვა, რაში სჭირდებოდა ეს „ოცნებას“? ანუ რატომ მოიცილეს ოთო აბესაძე?

ოთო აბესაძე: ჩემს შესახებ გამოიტანა განაჩენი სასამართლომ, რომელიც იყო საპროცესო განაჩენით გამყარებული. 2 წელი სამართლიანობისთვის ბრძოლაში დავტანჯე ჩემი ოჯახი, შევწირე ჯანმრთელობა და ამიტომ დავთანხმდი პროკურატურის შემოთავაზებას, საქმე გადაკვალიფიცირებულიყო ე.წ. არამართლზომიერი ზეგავლენის მოხდენის ნაკლებად მძიმე კატეგორიის დანაშაულზე. კვლავ რომ გაგრძელებულიყო სასამართლო დავა, ეს კიდევ გასტანდა მინიმუმ 1 წელს და შესაბამისად ავტომატურად გამოვაკლდებოდი იმ საერთაშორისო სამეცნიერო კვლევებს, რომელიც გირაოს ქვეშ მყოფმა შევძელი და გავაკეთე. ანუ, რაც მთავარია, ქრთამი და კორუფცია მოშორდა ჩემს სახელს. ჩემთვის ეს იყო მნიშვნელოვანი და დიდი გამარჯვება.

„მეტრონომი“: ანუ ბოლო ბოლო რა ბრალდება დაგრჩა? რა დაგაბრალეს საბოლოოდ?

ოთო აბესაძე:  მე ჩემს მეგობარს, რომელიც იყო მთავარი მოწმე ჩემს საქმეში, ვციტირებ ბრალდებაში არსებულ ტექსტს – რომ მე მას დავპირდი, ჩემი რესურსებით, შესაძლებლობებით და კონტაქტებით დავეხმარებოდი გარკვეული ნებართვის მიღებაში. ამას ჰქვია არამართლზომიერი ზეგავლენის მოხდენა. თქვენ თავად განსაჯეთ.

„მეტრონომი“: ოთო, ჩემს შეკითხვაში, მე შენს მიმართ „ოცნების“ პოლიტიკური დაკვეთა ვიგულისხმე…

ოთო აბესაძე: ადამიანი, რომელმაც ჩემზე განცხადება დაწერა, რომ მე თითქოს ავიღე ქრთამი, ჩემი საკმაოდ ახლო გარემოცვიდანაა. არა მარტო ერთი ადამიანი სხვათა შორის… ეს ადამიანი აღმოჩნდა საკმაოდ კვალიფიციური აგენტ-პროვოკატორი. მან შეასრულა თავისი ამოცანა , ჩამომაშორა საჯარო სივრცეს, აბსოლუტურად ყველა მიმდინარე პროცესს და გამიშვა ციხეში. ამას მოჰყვა ის, რომ გავხდი „კეთროვანი“ და ბევრმა ისიც თქვა, რომ მე საერთოდ არ მიცნობდა. ასე მიზანმიმართულად იმუშაოს ადამიანმა, ნუ რა ვიცი…

„მეტრონომი“: ოთო მე გკითხე მიზეზი. რატომ მეთქი, რას ფიქრობ?

ოთო აბესაძე:  არ ვიცი, მაგრამ ერთს ვიტყვი, ეს იყო ადამიანის დაღუპვა. ფაქტობრივად, 27 წლის ასაკში ცხოვრება დამანგრია თავზე.

„მეტრონომი“: ყოველთვის იყო და არის საუბარი იმაზე, რომ „ოცნებაში“ არსებობს ორი დაჯგუფება – ახალგაზრდული გუნდი და კონსერვატიული ფრთა. ხომ არ თვლი, რომ ამ ორი გუნდის დაპირისპირებას შეეწირა შენი პოლიტიკური პერსონა? და საერთოდ, შენ საკმაოდ ფესვგამდგარი იყავი „ოცნებაში“, რეალურად არსებობს ასეთი ორი გუნდი და რა ხდება შიდა სამზარეულოში?

ოთო აბესაძე: ბევრი მითები არსებობს, რომ „ოცნებაში“ თითქოს არის რაღაც ბანაკები. არ არის ასე, პირდაპირ გეუბნებით. არსებობს მხოლოდ ერთი ლიდერი ქართულ ოცნებაში. ეს არის ბიძინა ივანიშვილი. რაც შეეხება ჩემ ამბავს, მე დღემდე ვერ ამოვხსენი კონკრეტულად, ვის შეეძლო ჩემზე „ეზრუნა“ და ვის რა დავუშავე. არ ვიცი რა გითხრათ. არ ვიცი და სიმართლე გითხრათ არც მაინტერესებს. ეს ამბავი დავიწყებული მაქვს უკვე. ვიყურები მხოლოდ წინ.

 „მეტრონომი“: მე ვიცი, რომ საკმაოდ კარგი ურთიერთობა გქონდა ივანიშვილთან…

ოთო აბესაძე: რომელთან, ბიძინასთან? თუ ბერასთან? ბერასთან კი, მაგრამ ბიძინასთან სულ სამჯერ ვარ შეხვედრილი…

„მეტრონომი“: თუგინდ ბერასთან. არც ისაა ნაკლები ბერკეტი. მახსოვს, მის პოსტებს გარკვეული საკითხები გადაუწყვეტია… იმის თქმა მინდა, თუკი ასეთი ბერკეტები გქონდა, გამოდის ივანიშვილების სივრცის მიღმა მოხდა შენი ჩაძირვა?

ოთო აბესაძე: მიუხედავად ჩემი და ბერას კარგი ურთიერთობისა, რამდენჯერაც მას შევხვედრივარ, პოლიტიკურ საკითხებზე არასოდეს გვისაუბრია. მას არ აინტერესებდა პოლიტიკა.

„მეტრონომი“: არ მოვიდა დრო, დაასახელო ის ადამიანები, რომლებმაც „გაგწირეს“?

ოთო აბესაძე: ჩემი მორალი არ მაძლევს იმის უფლებას, რახან აღარ ვარ „ოცნების“ ნაწილი, ვილაპარაკო მათ ცუდ მხარეებზე. ჩემთვის ეს ამორალური საქციელია. იმათზე, ვისთანაც გქონდა საერთო წარსული, ან ლაპარაკობ კარგს, ან  – არაფერს. მოდი, მე ვიტყვი არაფერს. ჩემთვის „ოცნება“ დასრულდა 2017 წელს, როცა დამნაშავედ დამნიშნეს. ასე რომ, მე მათზე საუბარს წარსულზე არ ვაპირებ. კიდევ ერთხელ ვიმეორებ, აწმყო და მომავალი არის აბსოლუტურად სხვა, ვიდრე წარსული. ნამდვილად ვიყავი „ქართული ოცნების“ წევრი, გულშემატკივარი, ვისთვის სახეც…. მაგრამ 2017 წლის შემდეგ ჩვენი გზები გაიყო. დღეს მათ აქვთ თავიანთი პოლიტიკური და საზოგადოებრივი დღის წესრიგი და მე ჩემი. ასე რომ, თუ ვისაუბრებ „ქართულ ოცნებაზე“ ეს იქნება მხოლოდ აწმყო და მომავალი. წარსულზე საუბარი არ მიმაჩნია სწორად.

„მეტრონომი“: როგორია შენთვის „ოცნება“ 2017 წლის შემდეგ. რა შედეგებს უწინასწარმეტყველებდი ყოფილ გუნდს 2020 წლის არჩევნებში?

ოთო აბესაძე: როგორც დაიწყო „ოცნებამ“ და რა დაპირებებითაც დაიწყო თავისი პოლიტიკური კარიერა, დღეს ის „ოცნება“ აღარ არის. მათ ძალიან დიდი ძალისხმევა და ძალიან ბევრი მუშაობა მოუწევთ, რომ დაბრუნდნენ ადამიანების იმედებში. დღეს მათსა და საზოგადოების ნაწილს შორის ხიდები დამწვარია. ფორმულა – „არა მიხეილ სააკაშვილი“ კომფორტში ამყოფებდა „ოცნებას“, დღეს სხვა მონაცემებია. ეს ფორმულა აღარ იმუშავებს. 21-ე საუკუნე არის იდეოლოგიის, გამოწვევების და უნარების საუკუნე. „ოცნებას“ თუ შესწევს უნარი, ჯობს დადოს კონკრეტული პროექტები, განათლების, სოციალური მიმართულების და დაანახოს საზოგადოებას რეალურად რა შეუძლია ამ პოლიტიკურ გუნდს და არა ილაპარაკოს კვლავ წინა ხელისუფლებაზე. დღეს რასაც ვუყურებ, ეს არ არის „ქართული ოცნების“ დღის წესრიგი. სხვათაშორის, ამ მიმართულებით, რასაც ვუყურებ, არცერთი პოლიტიკური პარტია არ მუშაობს დღეს, რომელიც დადებდა რაიმე კონკრეტულ გეგმას და სტრატეგიას. ჩვენ ისევ იქ ვართ, რომ მე შენზე კარგი ვარ, შენ ჩემზე უარესი და ა. შ. ეს არ იმუშავებს… ბოლო კვლევებით, ყველამ ვიცით, რომ დიდი პროცენტია გადაუწყვეტელი ამომრჩევლის და ეს ამომრჩეველი დღეს ძალიან მომთხოვნი და გაზრდილია. ისინი ელოდებიან პროექტებს, ანალიტიკას და არა გაუთავებელ კინკლაობას.

„მეტრონომი“: ვიცი, რომ კომპენსაციის მოთხოვნას არ აპირებ. რატომ? არ გეგმავ რაიმე „პოლიტიკურ შურისძიებას“? საერთოდ, იქნები თუ არა პოლიტიკურად აქტიური და რა ფორმით?

ოთო აბესაძე: ამ თემით არასოდეს დავინტერესებულვარ. არ არის ეს ჩემი ინტერესის სფერო, რომ რაღაცაზე ვიდაო. არ მიმაჩნია, რომ ამით რამე მომემატება, ან ვიღაცას რაიმე დააკლდება. დროის უაზროდ კარგვას მსგავს იურიდიულ დავებში არ ვაპირებ. მით უმეტეს, საკმაოდ სერიოზული საქმეები მაქვს გასაკეთებელი. მთავარი კომპენსაცია მე უკვე მივიღე, როცა სასამართლომ თქვა, რომ ოთო აბესაძეს ქრთამი არ აუღია.

აქტივობას რაც შეეხება ამ ეტაპზე მხოლოდ სამეცნიერო საქმიანობით ვარ დაკავებული. მოგეხსენებათ დღეს ვარ საქართველოში 4 წამყვანი უნივერსიტეტის პროფესორი, ლატვიაში რიგის ტექნიკური უნივერსიტეტის მიწვეული ლექტორი და გერმანიაში ციტაუ გორლიცის უნივერსიტეტის მკვლევარი. ასევე მრავალ საერთაშორისო ორგანიზაციის პროექტში ვარ ჩართული.

ვაპირებდი ქვეყნის დატოვებას, ვინაიდან მაქვს მოწვევები როგორც გერმანიიდან, ისე ლატვიიდან მაგრამ მაინც გარკვეულ ჰიბრიდზე შევჯერდი. ვმუშაობ როგორც ევროპაში, ისევე საქართველოში. მინდა ჩემი რესურსი და გამოცდილება მოხმარდეს საქართველოს. მე ჩემი წილი საქართველო შემყავს ევროპაში უნივერსიტეტების აუდიტორიების გავლით. მე ასე მესმის ევროპასთან ინტეგრაცია.

„პოლიტიკური შურისძიება“ ჩემი სტილი არ არის. თანამედროვე ცივილურ სამყაროში პოლიტიკა დაფუძნებულია პროგრესსა და კვალიფიკაციაზე. ერთხელ და სამუდამოდ, ამ ქვეყანაში თანამედროვე პოლიტიკური სტანდარტების დანერგვა ხომ უნდა მოხდეს?! ეს არის დღევანდელი ჩვენი პოლიტიკური პროგრესის განმაპირობებელი. საქართველო იმსახურებს ჰქონდეს ევროპული პოლიტიკური კულტურა და არა შეუმდგარი ადამიანების გაერთიანებით შეკოწიწებული ჯგუფებით გაგრძელდეს პოლიტიკური ისტაბლიშმენტის დაკომპლექტება. დროა პოლიტიკოსს დაერქვას დარგის პოლიტიკოსი, დარგის პოლიტიკის განმსაზღვრელი და არა ყოვლისმცოდნე პოლიტიკოსების ტრადიცია გაგრძელდეს.

„მეტრონომი“: ბოლო-ბოლო, რა ფორმით დაბრუნდები პოლიტიკაში? როგორ გესახება შენი პოლიტიკური რეაბილიტაცია?

ოთო აბესაძე: კვირის განმავლობაში ველაპარაკები 3 000-ზე მეტ სტუდენტს. მათი მოთხოვნები დღეს სულ სხვაა, ვიდრე მესიის ლოდინი. ჩემი მიზანი არის თანამედროვე სტანდარტები განათლებასა თუ ეკონომიკაში, თანამედროვე რეფორმები ადვილად  მივიდეს ადამიანებამდე საქართველოში. ამას მე აუცილებლად გავაკეთებ სხვადასხვა გზით, პოლიტიკოსებთან ურთიერთობით, სოციალურ ქსელში თუ სხვ.

სხვათა შორის, ბევრმა შემომთავაზა პოლიტიკური თანამშრომლობა. გუნდებმაც და პერსონებმაც… ჯერ არ მსურს ამაზე საუბარი ვინაიდან ჯერ ჩემთვის პრიორიტეტი არის მეცნიერება და საერთაშორისო კვლევები. შევაჯამებ მათ შეხედულებებს, ფასეულობებს, იდეებს და შემდეგ მივიღებ გადაწყვეტილებას.

„მეტრონომი“: „ოცნების“ ხელისუფლებაში შიდა სამზარეულოს კარგად იცნობ. შეგიძლია თქვა, რომ დღეს, საჯარო უწყებებში კორუფცია არ არის?

ოთო აბესაძე: თუ ქვეყანაში დღეს, კორუფციის ზღვარი ჩემზე და 3 ათასზე გადის, დაე, მე ვიყო მთავარი კორუმპირებული საქართველოში (იცინის)…

სხვათა შორის, ერთი მინდა აღვნიშნო აუცილებლად, როცა წლების წინ, პირველად ტროლების და ბოტების სისტემა ამუშავდა, მათი ერთ-ერთი პირველი მსხვერპლი მე ვიყავი.  როდესაც დამაკავეს ჩემზე განხორციელდა სოციალურ ქსელში ძალიან დიდი შტურმი. შეიქმნა საზოგადოებრივი აზრი, რომ თურმე მე ვიყავი ამ ქვეყნის ამომგდები და ა.შ. ამ ყოველივეს კითხულობდა ჩემი ოჯახი და ეს იყო უდიდესი ტრაგედია მათთვის. ყველა დროის ყველაზე კორუმპირებულ ადამიანად წარმომაჩინეს ქვეყანაში. მაშინ ვერ ხვდებოდბენ, რომ ესენი იყვნენ უბრალოდ ტროლები და ბოტები. როდესაც დავტოვე საპატიმრო და სათითაოდ ვნახე ყველა ის პროფილი თუ გვერდი, რომელიც სახელმწიფოს მტრად მაცხადებდა აღმოჩნდა, რომ ე. წ. ტროლების ერთ-ერთი პირველი მსხვერპლი ვიყავი. სამწუხაროდ მაშინ არ იყო ეს „მანქანა“ გაშიფრული და შეძლეს მათ საშინელი საზოგადოებრივი აზრის ჩამოყალიბება ჩემზე.

„მეტრონომი“: ანუ გამოდის, „ქართული ოცნების“ დაკვეთა ყოფილხარ?

ოთო აბესაძე: იყო დაკვეთა თუ არა, არ ვიცი, მაგრამ ფაქტია, რომ ყველაფერი იყო მომართული ჩემს წინააღმდეგ, დამიჭირეს, მაგრამ გაირკვა, რომ მექრთამე არ ვარ. დრომ აჩვენა, რომ ჩემს მიმართ „ტროლების“ მიერ ჩატარებულმა ექსპერიმენტმა საბოლოოდ, არ გაამართლა.

ციხიდან გამოსვლის შემდეგ, მე გადავაფასე ჩემი ყველა რესურსი, დავიწყე ნულიდან  და სიამაყით შემიძლია ვთქვა, რომ დღეს, ვარ 4 წამყვანი უნივერსიტეტის პროფესორი. ვკითხულობ ლექციებს უცხოეთშიც. ჩემი მთავარი ჯეკ პოტი რაც იყო ის არის, რომ გერმანიაში მიმიწვიეს მკვლევარად. ასე რომ, ვთვლი,  მეცნიერებაში და საერთაშორისო პროექტებში საკმაოდ სერიოზულ წარმატებას მივაღწიე ციხიდან გამოსვლის შემდეგ და ეს მახარებს.

„მეტრონომი“: ბოლოს მინდა მაინც გკითხო, მაღლა კი დაგისვი მსგავსი შეკითხვა, მაგრამ მინდა დავაკონკრეტო. იქნებ დაასახელო ის ადამიანები, რომლებმაც სასამართლოს გადაწყვეტილებიდან გამომდინარე, დაგაბრალეს მექრთამეობა. ისინი ხომ იმ გუნდის წევრები არიან, ვისაც შესაძლოა საზოგადოებამ ხვალ მისცეს ხმა არჩევნებზე? არ გრძნობ მსგავს ვალდებულებას და პასუხისმგებლობას საზოგადოების წინაშე?

ოთო აბესაძე: ადამიანებმა ყველაფერი იციან ძალიან კარგად. მე მათ ვეტყოდი, რომ ხმა მისცენ იმას, ვინც დადებს განვითარების სტრატეგიას და არა – პერსონას.

პასუხისმგებლობას რომ ვგრძნობ იმიტომ ვამბობ, რომ აღარ ვაპირებ წარსულზე საუბარს. მორჩა, დაიხურა ეს თემა ჩემთვის. ეს თემა დახურა სასამართლომ, როცა გამამართლა. კონკრეტული პერსონები უბრალოდ არ მაინტერესებს. ვიყურები მხოლოდ წინ და წინ. არის ძალიან ბევრი საერთაშორისო პროექტი და გამოწვევა, რომელიც აუცილებლად უნდა დავნერგო საქართველოში. განსაკუთრებით განათლების სფეროში.

ესაუბრა გენო ჯოხიძე

 

ამავე თემაზე
ავიაბილეთები იაფად
იტვირთბა....