პარლამენტის პლენარულ სხდომაზე დამოუკიდებელმა დეპუტატმა ეკა ბესელიამ განათლების, მეცნიერების, კულტურისა და სპორტის მინისტრს, მიხეილ ჩხენკელს, რომელსაც დეპუტატები „მინისტრის საათის“ ფორმატში დღეს პარლამენტში უსმენენ მიმართა და განუცხადა, რომ უნდა ვილაპარაკოთ პირველ რიგში უსაფრთხოების იმ აუცილებელ სტანდარტზე, იმ აუცილებელ წინაპირობებზე, რომ ბავშვები არ ხდებოდნენ ამ ტრაგედიის მსხვერპლნი.
ბესელია მინისტრისგან დაინტერესდა, რა გაარკვია სამინისტრომ ლუკა სირაძის საქმესთან დაკავშირებით და რატომ არ გაითვალისწინა სამინისტრომ ის რეკომენდაციები, რომელიც ამ ტრაგიკულ შემთხვევამდე დიდი ხნით ადრე ხორავას ქუჩაზე მომხდარი ინცინდენტის შედეგად გარდაცვლილთა საქმეზე პარლამენტმა გასცა.
„საკმარისი დრო გავიდა იმისთვის, რომ სამინისტროს ჰქონდეს მეტი ინფორმაცია რა მოხდა ლუკას შემთხვევაში, რატომ მოხდა ბავშვის გადაცემა სკოლიდან პოლიციისთვის, საგამოძიებო ორგანოსთვის. რატომ მოხდა 15 წლის ბავშვის გადაყვანა, როცა სისხლის სამართლის დანაშაული არ არსებობდა რა იყო ის, რამაც დაარღვია ყველა სტანდარტი, წესი, არასრულწლოვანთა მართლმსაჯულების კოდექსი და ბავშვი სკოლამ გადასცა საგამოძიებო ორგანოებს; გამომძიებელთან იმყოფებოდა ამდენი ხნის განმავლობაში. რა გაარკვიეთ? რა დაადგინეთ? რატომ მოხდა ეს რაც მოხდა? რატომ იყო დაშვებული ეს უმძიმესი შემთხვევა, რაც მერე ჯაჭვივით გადაება?
თქვენ გახსოვთ, როდესაც პარლამენტმა გასცა რეკომენდაციები თქვენი სამინისტროს სახელზე, ეს ეხებოდა დათუნა სარალიძის და სხვების საქმეზე დარღვევებს, რომელიც სისტემური რეფორმების განხორციელებას გულისხმობდა, უსაფრთხო სკოლის თაობაზე რეფორმას გულისხმობდა. რა გაკეთდა უსაფრთხო სკოლისთვის? ჩვენ დღეს კონკურსებზე ვერ ვილაპარაკებთ, უნდა ვილაპარაკოთ პირველ რიგში უსაფრთხოების იმ აუცილებელ სტანდარტზე, იმ აუცილებელ წინაპირობებზე, რომ ბავშვები არ ხდებოდნენ ამ ტრაგედიის მსხვერპლნი. ამაზე გვინდა პასუხი“, – განაცხადა ბესელიამ.
შეგახაენებთ, რომ დღეს პარლამენტში განათლების მინისტრს, მიხეილ ჩხენკელს უსმენენ.