საზოგადოებრივი მოძრაობა „ლელოს“ დამფუძნებელმა, მამუკა ხაზარაძემ საქალაქო სასამართლოში, სადაც მისი და ბადრი ჯაფარიძის სასამართლო პროცესი იმართება განაცხადა, რომ ივანიშვილს უყიდა ბილეთი, თბილისი-მოსკოვის მიმართულებაზე
მისი თქმით, საქართველო მას შემდეგ დაადგება განვითარების გზას, როცა ბიძინა ივანიშვილი ქვეყანას დატოვებს.
„ჩვენ რამდენიმე დღის წინ მოვისმინეთ ივანიშვილის უსირცხვილო განცხადება და დამოკიდებულება ქართველი ხალხის მიმართ, როდესაც მან თქვა, რომ ბიუჯეტის ხარჯზე დააფინანსებს 35 ევროიან ბილეთებს ქუთაისის აეროპორტიდან და მოსახლეობას, იმ ადამიანებს, ვისაც ასე ძალიან სჭირდება სამუშაო ადგილი, ნორმალური, ღირსეული ცხოვრება ჩვენ ქვეყანაში, გაუშვებს სხვა ქვეყანაში და დაეხმარება ჩვენს ისედაც დემოგრაფიულად კლებად ერს, ისედაც ძალიან მძიმე სოციალურ მდგომარეობაში მყოფ მოსახლეობას უცხოეთში დასაქმებაში. ამას აკეთებს ჩვენი ბიუჯეტით, ჩვენი გადასახადებით და პრაქტიკულად ჩვენს მოსახლეობას ეუბნება – საქართველო ქართველების გარეშე.
მე გადავწყვიტე და ბიძინა ივანიშვილს ვუყიდე ბილეთი, ეს არის „აეროფლოტის“ ბილეთი, გამოწერილია ბიძინა ივანიშვილის სახელზე. ეს არის თბილისი-მოსკოვის მიმართულება. ეს არ არის 35- ევროიანი ბილეთი, ეს არის ბიზნესკლასი, იმიტომ, რომ შეჩვეულია კარგ ცხოვრებას და მას შეუძლია დატოვოს ჩვენი ქვეყანა“, – განაცხადა ხაზარაძემ.
რაც შეეხება დღევანდელ სასამართლო პროცესს, ხაზარაძემ განაცხადა, რომ ბიძინა ივანიშვილის პროკურატურის შოუ გრძელდება.