პარლამენტის თავმჯდომარემ ბიუროს სხდომაზე პარლამენტის ვაკანტურ თანამდებობებზე უმრავლესობის მიერ წარდგენილი კანდიდატურები დაასახელა.
არჩილ თალაკვაძის განცხადებით, საპარლამენტო უმრავლესობის ლიდერად მამუკა მდინარაძე დაინიშნა. მდინარაძე ასევე პარლამენტის ვიცე-სპიკერის პოსტსაც შეითავსებს.
პარლამენტის პირველი ვიცე-სპიკერის თანამდებობაზე წარდგენილია გია ვოლსკის კანდიდატურა. ვიცე-სპიკერების პოსტს დაიკავებენ, ასევე, გიორგი კახიანი და კახა კუჭავა.
ევროინტეგრაციის კომიტეტს დავით სონღულაშვილი უხელმძღვანელებს, საგარეო ურთიერთობათა კომიტეტს – ირაკლი ბერაია, გარემოსა და ბუნებრივი რესურსების კომიტეტს – ნინო წილოსანი, განათლების, მეცნიერების და კულტურის კომიტეტს – გენადი მარგველაშვილი, ხოლო საპროცედურო საკითხთა კომიტეტს – გურამ მაჭარაშვილი.