სოფელ ჩორჩანას საგუშაგოსთან მყოფმა საქართველოს უსაფრთხოების საბჭოს აპარატის უფროსმა, კახა ქემოკლიძემ საქართველოს პირველ არხს განუცხადა, რომ მოცემული მომენტისთვის ვითარება სტაბილურია და ადგილზე სიმშვიდეა. რამდენიმე გასროლის შესახებ გავრცელდა ინფორმაცია, მაგრამ ვარაუდით, ეს იყო უფრო გლუვლულიანი ცეცხლსასროლი საშუალებიდან განხორციელებული გასროლა, რომელიც შესაძლოა, უკავშირდებოდეს გარკვეულწილად აქტიურ ნადირობის სეზონს.
მისი თქმით, ადგილზე იმყოფებიან შსს-სა და ევროკავშირის სადამკვირვებლო მისიის წარმომადგენლები.
ქემოკლიძემ იმედი გამოთქვა, რომ ვითარება მოლაპარაკებების გზით დარეგულირდება.
„ვარაუდის დონეზე შეგვიძლია, ყველაფერზე ვივარაუდოთ. მაინც მგონია, რომ გუშინდელი, რბილად რომ ვთქვათ, უცნაური განცხადებები დე-ფაქტო ხელისუფლების სხვადასხვა წარმომადგენლის მხრიდან უფრო იყო გაკეთებული ემოციურ ფონზე. ჩვენ გვაქვს ძალიან დიდი იმედი იმისა, რომ მოხდება ვითარების დარეგულირება მოლაპარაკებების გზით. ამისთვის ცენტრალური ხელისუფლების წარმომადგენლები აცხადებენ სრულ მზაობას და იმედი გვაქვს, რომ ინციდენტების პრევენციისა და მათზე რეაგირების მექანიზმის ჯგუფის შეხვედრების ფორმატი ისევ ისეთ ეფექტიან რეჟიმში გაგრძელდება, როგორც აქამდე ხორციელდება. მზად ვართ, კონსტრუქციული თანამშრომლობისთვის“, – აღნიშნა ქემოკლიძემ.
როგორც საქართველოს უსაფრთხოების საბჭოს აპარატის უფროსმა ჩორჩანას საგუშაგოსთან განაცხადა, ეს არის ტერიტორია, სადაც საქართველოს ცენტრალური ხელისუფლების ეფექტიანი იურისდიქცია ვრცელდებოდა 2008 წლის რუსეთ-საქართველოს ომამდე და მის შემდეგაც.
„ტერმინოლოგიის თვალსაზრისით აბსოლუტურად ზუსტი რომ ვიყოთ, ეს არის ის ტერიტორია, სადაც საქართველოს ცენტრალური ხელისუფლების ეფექტური იურისდიქცია ვრცელდებოდა 2008 წლის რუსეთ-საქართველოს ომამდე და მის შემდეგაც. რატომ გახდა ეს დე-ფაქტო ხელისუფლების მხრიდან გარკვეული პოლემიკის საგანი, რთულად გასაანალიზებელია მოცემული მომენტისთვის, მაგრამ დღეის მოცემულობით რაც შეგვიძლია ვთქვათ, არის ის, რომ ცენტრალური ხელისუფლების წარმომადგენლები აცხადებენ აბსოლუტურ მზაობას, რომ აღნიშნული საკითხი დარეგულირდეს მხოლოდ და მხოლოდ აქტიური მოლაპარაკებების, დიპლომატიის და კონსტრუქციული თანამშრომლობის გზით“, – აღნიშნა კახა ქემოკლიძემ.
მისივე თქმით, ბლოკპოსტის დაშლა არ მოხდება.
„საქართველოს ცენტალური ხელისუფლება დააპირებს პოლიციის ბლოკპოსტის დაშლას იმ შემთხვევაში, თუ ეს ბლოკპოსტი შექმნის გარკვეულ პრობლემებს ადგილობრივი მოსახლეობისთვის, იმ ადამიანებისთვის, რომლებიც შესაძლოა, ცხოვრობდნენ საოკუპაციო ხაზის მეორე მხარეს. მოცემული მომენტისთვის მსგავსი არაფერი ხდება, პირიქით, აღნიშნული ბლოკპოსტი ასრულებს იმ მისიას, რომ ადგილზე მაქსიმალური უსაფრთხოება იქნას ყველასთვის უზრუნველყოფილი. შესაბამისად, ბლოკპოსტი დარჩება იქ, სადაც არის“, – განაცხადა ქემოკლიძემ.
ოკუპირებული ცხინვალის დე ფაქტო რეჟიმის წარმომადგენლების მოთხოვნის ვადა ამოიწურა. მათ 30 აგვისტოს, 06:00 საათამდე ქართული პოსტის გაუქმება მოითხოვეს.