პარტია „ნაციონალური მოძრაობის“ თავმჯდომარის, რომან გოცირიძის, განცხადებით, სტრასბურგის სასამართლომ ტელეკომპანია „რუსთავი 2“-ის საქმეზე შეცდომა დაუშვა.
გოცირიძემ ჟურნალისტებთან საუბრისას აღნიშნა, რომ ევროსასამართლომ მხოლოდ ერთი მიმართულებით იმსჯელა და დანარჩენი საკითხები არ განიხილა.
„შეიძლება ჩავთვალოთ, რომ სტრასბურგის სასამართლოს დაუშვებელი შეცდომა მოუვიდა. ძალიან ძნელია რამე მოტივების თქმა. არის სხვადასხვა ქვეყნის მოსამართლე. მათ შორის, ერთ-ერთი მოსამართლეა, რომელსაც ამ ადამიანებთან მრავალთვიანი კონტაქტი ჰქონდა. ეს იყო ლადო ჭანტურია, რომელიც არის პირდაპირ ყურმოჭრილი ადამიანი, ივანიშვილის მიერ დანიშნული და პირდაპირ ხაზზე იყო თეა წულუკიანთან. ამ შემთხვევაში, ლადო ჭანტურიას როლი უკიდურესად ცუდი იყო, ტენდენციური მოსამართლე იყო. სტრასბურგის სასამართლო ძალიან ცუდად მოიქცა, რომ ლადო ჭანტურიას აცილება არ მისცა. თითოეული მოსამართლის ბიოგრაფია გავაანალიზეთ. მათ შორის, ერთ-ერთის, რომელიც კავკასიურ საკითხებში მუშაობდა, რომელსაც გარკვეული სიმპატიები ჰქონდა, არ დავასახელებ რომელი სახელმწიფოს მოსამართლეა“, – განაცხადა გოცირიძემ.
გოცირიძე ასევე აღნიშნავს, რომ სასამართლოს შეცდომისკენ ხშირად უბიძგებს გარკვეული ქმედებები და მათ შორის, მოსამართლეთა პირადი ურთიერთობებიც
„გამორიცხული არ არის, რომ საქმის მსვლელობა ასეთი ნეგატიური მიმართულებით მისი დამსახურება იყოს. შეცდომა ყველა სასამართლოს მოსდის. სასამართლოს შეცდომისკენ ხშირად უბიძგებს ხოლმე გარკვეული ქმედებები და მათ შორის, მოსამართლეთა პირადი ურთიერთობებიც. დიდი ხნის განმავლობაში ვიცოდით, რომ ლადო ჭანტურია ძირგამომთხრელ საქმიანობას ეწეოდა, მას პირდაპირი კავშირი ჰქონდა წულუკიანთან, ივანიშვილთან და ინფორმაცია დიდი ხნის განმავლობაში მოდიოდა, რომ ჭანტურია მოსამართლეებთან პერსონალურ ახსნა-განმარტებას ეწეოდა. არ არის გამორიცხული, რომ კოლეგის აქტიურობამ გავლენა მოახდინა შედეგებზე, თუმცა არ ვამტკიცებთ, რომ ჭანტურიას ფაქტორი იყო გადამწყვეტი. ფაქტია, რომ სტრასბურგის სასამართლოს შეცდომა მოუვიდა, შეცდომები მომხდარა და მათ შორის, სტრასბურგის სასამართლოს საქმიანობაში“, – ამბობს დეპუტატი.
შეგახსენებთ, რომ სტრასბურგის სასამართლომ რუსთავი 2-ის საქმეზე საბოლოო გადაწყვეტილება გამოაცხადა. სტრასბურგის სასამართლომ რუსთავი 2-ის საქმეზე, არც ერთ მუხლზე დარღვევა არ დადგინდა.
ამავე გადაწყვეტილებით, გაუქმდა უზენაესი სასამართლოს საბოლოო გადაწყვეტილების აღსრულების შეჩერების დროებითი მექანიზმი. ამ მექანიზმით, 2017 წელს ქიბარ ხალვაშმა რუსთავი 2-ის წილები ვერ გადაიფორმა.
რუსთავი 2 საქმეს სტრასბურგის სასამართლოს ზედა პალატაში გაასაჩივრებს.
ქიბარ ხალვაშმა დღესვე განცხადება გაავრცელა, რომ ტელეკომპანიას მისი ადვოკატი პაატა სალია უხელმძღვანელებს.
ამავდროულად, ქიბარ ხალვაშმა რეესტრს ნიკა გვარამია გადაყენების მოთხოვნით მიმართა.
ამავდროულად გვარამიამ განაცხაა, რომ მას კონტრაქტი აქვს და მის ამოწურვამდე არსად წავა.
ქიბარ ხალვაშმა “რუსთავი 2-ის” წილების გადასაფორმებლად საჯარო რეესტრს უკვე მიმართა.
იუსტიციის სახლში ამ წუთებში ოფიციალურად დარეგისტრირდა ქიბარ ხალვაში როგორც “რუსთავი 2”-ის მესაკუთრე. დოკუმენტების მიხედვით, ის 60 პროცენტის მფლობელია, ხოლო შპს “პანორამა” – 40.
გარდა ამისა, ხალვაშმა მეორე განცხადებითაც მიმართა რეესტრს, რომლის საფუძველზეც ნიკა გვარამია “რუსთავი 2-ის” გენერალური დირექტორი აღარ არის. ქიბარ ხალვაშმა შპს „სამაუწყებლო კომპანია რუსთავი 2“-ის დირექტორად პაატა სალია დანიშნა.
„რუსთავი 2“-ის ყოფილმა მესაკუთრე ქიბარ ხალვაშმა, 2015 წლის 4 აგვისტოს საქართველოში სამოქალაქო დავა დაიწყო. იგი აცხადებდა, რომ 2005-2006 წლებში, როდესაც ერთიანი ნაციონალური მოძრაობა ხელისუფლების სათავეში იდგა, პრეზიდენტმა მიხეილ სააკაშვილმა და მაღალი თანამდებობის პირებმა იგი აიძულეს გაესხვისებინა თავისი წილები ტელეკომპანია „რუსთავი 2“-ში, რადგან არ მოსწონდათ ტელევიზიის სარედაქციო პოლიტიკა.
2017 წლის 2 მარტის გადაწყვეტილებით საქართველოს უზენაესი სასამართლოს დიდმა პალატამ ერთხმად მიიღო გადაწყვეტილება, რომლითაც ტელეკომპანია „რუსთავი 2“-ის კანონიერ მფლობელად ქიბარ ხალვაში და მისი კომპანია „პანორამა“ გამოაცხადა.
2017 წლის 3 მარტს, რუსთავი 2-ის ადვოკატების მიმართვის საფუძველზე, სტრასბურგის სასამართლომ საქართველოს მთავრობას უზენაესი სასამართლოს 2 მარტის გადაწყვეტილების აღსრულების შეჩერება დაავალა და მიუთითა:
„შეჩერდეს საქართველოს უზენაესი სასამართლოს 2017 წლის 2 მარტის გადაწყვეტილების აღსრულება და საქართველოს ხელისუფლებამ თავი შეიკავოს რაიმე ფორმით მომჩივანი კომპანიის სარედაქციო პოლიტიკაში ჩარევისგან“.
მოცემული შეჩერების ზომა 2017 წლის 7 მარტს ევროპული სასამართლის მიერ გაგრძელებულ იქნა „მორიგ შეტყობინებამდე“.
სტრასბურგის სასამართლო საქმის არსებითად განხილვას 2017 წლის 28 ნოემბრიდან შეუდგა. მხარეთა მიერ პოზიციების წარდგენა 2018 წლის 15 სექტემბერს დასრულდა.
ქართულ სასამართლოებში წარმოებულ პროცესთან დაკავშირებით, ტელეკომპანია „რუსთავი 2“ საქართველოს სახელმწიფოს უჩიოდა ევროპული კონვენციის მე-6 მუხლის (სამართლიანი სასამართლოს უფლება), მე-10 მუხლისა (გამოხატვის თავისუფლება) და დამატებითი ოქმის პირველი მუხლის (საკუთრების უფლება) საფუძველზე, როგორც ცალკე, ისე კონვენციის მე-18 მუხლთან ერთობლიობაში. კერძოდ, მომჩივანი ამტკიცებდა, რომ 2015 წლის 5 აგვისტოს უზრუნველყოფის ღონისძიების განგრძობადი გამოყენებით კომპანიის ქონების დაყადაღება წარმოადგენდა თვითნებურ გადაწყვეტილებას, რაც არაპროპორციულად ზღუდავდა მის საკუთრების უფლებას, უარყოფით გავლენას ახდენდა მის სარედაქციო დამოუკიდებლობაზე და წარმოადგენდა ტელეარხის გაჩუმების ფარულ მცდელობას. „რუსთავი 2“ ასევე ასაჩივრებდა, რომ ზოგიერთი გარემოების გათვალისწინებით, მოსამართლე თამაზ ურთმელიძის, უზენაესი სასამართლოს თავმჯდომარის ნინო გვენეტაძისა და უზენაესი სასამართლოს მოსამართლე მზია თოდუას ჩართულობა უზრუნველყოფის ღონისძიების პროცედურებში უტოლდებოდა სასამართლოს დამოუკიდებლობისა და მიუკერძოებლობის პრინციპების დარღვევას.