საეჭვოა, რომ დღევანდელი მდგომარეობით, გახარიას გადადგომასთან დაკავშირებული მიზანი მიღწევადი იყოს, – ამის შესახებ ფილოსოფოსმა ზაზა ფირალიშვილმა „ინტერპრესნიუსს“ პარლამენტთან მიმდინარე აქციების შესახებ საუბრისას განუცხადა.
მისი განმარტებით, ძნელია იმის თქმა, ამოწურა თუ არა აქციებმა თავისი თავი, რადგან გააჩნია, როგორ ორგანიზაციულ ფორმებს შეიძენს.
„ძნელი სათქმელია, რამდენად არიან მზად იმისათვის, რომ ბრძოლა განაგრძონ და უფრო მეტს მიაღწიონ. საამისოდ მათ არ აქვთ არც გამოცდილება და არც ორგანიზაციული გამართულობა. ერთი რამ კარგად იციან, პოლიტიკურ ძალებთან ორგანული კავშირი ამ აქციების საზოგადოებრივ ხასიათს ავნებს. საეჭვოა, რომ დღევანდელი მდგომარეობით, გახარიას გადადგომასთან დაკავშირებული მიზანი მიღწევადი იყოს. გიორგი გახარიას, როგორც ჩანს, ის კავშირი აქვს ხელისუფლებაში და შეიძლება, საერთაშირისოც, რომლებიც მას უფრო მყარად აგრძნობინებს თავს, ვიდრე კობახიძესა და ქუცნაშვილს“, – განაცხადა ზაზა ფირალიშვილმა.
მისი თქმით, აქციის მონაწილეებმა უკვე ბევრს მიაღწიეს, მათ შორის ირაკლი კობახიძის მიერ პარლამენტის თავმჯდომარის თანამდებობის დატოვებას, რაც „სერიოზულ პოლიტიკურ კრიზისზე მიუთითებს“.
ფირალიშვილის შეფასებით, „ამ საქმეს პოლიტიკოსები ვერ უშველიან“, თუმცა ვნებათაღელვის გამოწვევა რამდენჯერმე უკვე სცადეს, რაც საზოგადოებრივ მხარდაჭერას ასუსტებს.
„პოლიტიკოსების როლის გაძლიერება გამოიწვევს საზოგადოებრივი მხარდაჭერის შესუსტებას, რომელიც ამ აქციებში მონაწილე ახალგაზრდობას ჯერ კიდევ აქვს. გარდა ამისა, ძალიან დიდი მნიშვნელობა აქვს, საკუთარი მოთხოვნების მოცულობას და მათი განხორციელების შესაძლებლობას რამდენად ზუსტად განსაზღვრავენ. თუ ისინი ამას ვერ შეძლებენ, ასე სპონტანურად განაგრძობენ, საბოლოო ჯამში, ეს აქციები შეიძლება არასასურველად ჩაინავლოს. ეს კარგი არც საზოგადოებისთვის არის და არც შემდგომი პოლიტიკური მოვლენებისთვის“, – განაცხადა ფირალიშვილმა.