დამოუკიდებელი დეპუტატის ლევან გოგიჩაიშვილის განცხადებით, ირაკლი კობახიძე პარლამენტის თავმჯდომარის თანამდებობიდან გუშინ უნდა გადამდგარიყო.
„ნაციონალურ მოძრაობას“ თავისი წილი პასუხისმგებლობა და ტვირთი აქვს, მაგრამ გუშინდელი დღე თავიდან ბოლომდე ხელისუფლების შექმნილი იყო. განზრახ იყო თუ ბრიყვული შეცდომა, ამას მნიშვნელობა არ აქვს. შეცდომა დაუშვა და უნდა ეგრძნო, რომ თანამდებობიდან უნდა წასულიყო. კობახიძე გადადგა, მაგრამ დასახიჩრებული არიან ახალგაზრდა ადამიანები, რომელთაც გულწრფელი პროტესტი აქვთ, ქვეყანაში არ უნდათ რუსული პოლიტიკა. პრინციპში, ირაკლი კობახიძე გააგდეს. ეს იყო გაგდება და არა გადადგომა. მორჩა, საქართველო სხვა ქვეყანაა. არასახარბიელო მდგომარეობაშია „ქართული ოცნება“. ერთ მხარეს ერთი სისტემა „ქართული ოცნებაა“, მეორე მხარეს – „ნაციონალური მოძრაობა“. ეს სისტემა უნდა ჩამოიშალოს და დახუთულობისგან პოლიტიკური სივრცის გათავისუფლება უნდა მოხდეს. გუშინ ამის დასაწყისი იყო”, – განაცხადა დეპუტატმა.
გოგიჩაიშვილი პარლამენტის თავმჯდომარის თანამდებობაზე არჩილ თალაკვაძის კანდიდატურის შესაძლო წარდგენასაც ეხმაურება.
„ნუ ჩქარობენ პარლამენტის თავმჯდომარის კანდიდატურის შერჩევას. პარლამენტის თავმჯდომარის კანდიდატურა კონსენსუსით უნდა იყოს შერჩეული. თანხმობა უნდა იყოს, რათა პარლამენტის თავმჯდომარემ 2020 წლამდე უნდა შეინარჩუნოს პოლიტიკური ნეიტრალიტეტი. მან სწორი პოლიტიკური პროცესის წარმართვა უნდა უზრუნველყოს, რომელიც 2020 წელს მშვიდობიანად ჩაგვატარებინებს. კანდიდატების შერჩევა კონსენსუსით უნდა მოხდეს, ახალ პარლამენტის თავმჯდომარეს ეს ფუნქცია უნდა ჰქონდეს“, – აღნიშნა გოგიჩაიშვილმა.
„ქართული ოცნების“ ოფისში პოლიტსაბჭოს სხდომა გაიმართა. სხდომის შემდეგ ცნობილი გახდა, რომ ირაკლი კობახიძე პარლამენტის თავმჯდომარის თანამდებობას ტოვებს.
შეგახსნებთ, გუშინ, 20ივნისს, საქართველოს პარლამენტში მიმდინარე მართლმადიდებლობის საპარლამენტთაშორისო ასამბლეის 26-ე გენერალურ სესიას რუსეთის დუმის კომუნისტური პარტიის წევრი სერგეი გავრილოვი უძღვებოდა.
რის შემდეგაც, პარლამენტის წინ, აქციის მონაწილეებმა მომხდარი გააპროტესტეს.
აქციის დაწყებიდან რამდენიმე საათში ნიკა მელიამ მოუწოდა აქციის მონაწილეებს, რომ შესულიყვნენ პარლამენტის შენობაში. რამდენიმე საათის განმავლობაში პარლამენტის კიბეებთან პოლიციასა და მომიტინგეების ნაწილს შორის ხელჩართული ჩხუბი მიმდინარეობდა.
ამის შემდეგ პოლიციამ აქციის დაშლა დაიწყო. დაშლა და აქციის მონაწილეების დაპატიმრება გამთენიისას დასრულდა. დაშლისას სამართალდამცავებმა გამოიყენეს წყლის ჭავლი, რეზინის ტყვიები და ცრემლსადენი გაზი.
ჯანდაცვის მინისტრის პირველმა მოადგილემ, ზაზა ბოხუამ ინგოროყვას კლინიკაში, სადაც აქციებზე დაშავებული პაციენტები მოინახულა და განაცხადა, რომ აქციებზე სულ 240 ადამიანი დაშავდა, მათგან 102 პაციენტი კლინიკებში რჩება.