სამართლიანი არჩევნებისა და დემოკრატიის საერთაშორისო საზოგადოების ხელმძღვანელის, მიხეილ ბენიძის განცხადებით, ორგანიზაციის ყველა დამკვირვებელს საარჩევნო უბანზე შესვლისა და შეუზღუდავად დაკვირვების საშუალება მიეცა.
მისივე თქმით, მთაწმინდის ოლქის ყველა (100%) საარჩევნო უბანი მზად იყო კენჭისყრის დასაწყებად 08:00 საათისთვის და უბნების უმრავლესობაზე უბნის გახსნისა და მოწყობის პროცესი მნიშვნელოვანი დარღვევების გარეშე წარიმართა.
„ტენდენციის სახით შეინიშნება, მთაწმინდის საარჩევნო ოლქის მე-11, მე-18, 22-ე, 32-ე და 33-ე საარჩევნო უბნებზე სხვადასხვა სადამკვირვებლო ორგანიზაციების წარმომადგენლების მობილიზება, რომლებიც ამომრჩევლებს აღრიცხავენ სახელისა და გვარის მიხედვით.
მე-11 საარჩევნო უბანზე აღნიშნულს ახორციელებს სადამკვირვებლო ორგანიზაციის „მრავალეთნიკური ერთობა“ წარმომადგენელი; მე-18 და 32-ე საარჩევნო უბნებზე – „საქართველოს ერთიან ახალგაზრდათა კავშირის“ წარმომადგენელი; 22-ე საარჩევნო უბანზე – „მოძრაობა საქართველოს ერთობისა და გაერთიანებისთვის“ წარმომადგენელი; 33-ე საარჩევნო უბანზე – „სამართალდამცავთა დაცვის ლიგას“ წარმომადგენელი.
მე-12 საარჩევნო უბანზე ერთ-ერთი რეგისტრატორის მიერ მოსული ამომრჩევლების აღრიცხვის ფაქტი დამკვირვებლებმა გააპროტესტეს, რასაც უთანხმოება მოჰყვა. ცესკოს წარმომადგენლის ჩარევის შემდეგ რეგისტრატორი ჩამოაშორეს მისი ფუნქციების განხორციელებას და პრობლემა აღმოიფხვრა.
მე-3 საარჩევნო უბანზე რეგისტრატორმა ამომრჩეველს შვილის გრაფაში მოაწერინა ხელი“,- განაცხადა ბენიძემ.
დღეს თბილისში, მთაწმინდაზე მაჟორიტარის არჩევნების მეორე ტური იმართება.