კიევის მერმა, ყოფილმა მოკრივემ, ვიტალი კლიჩკომ მისი პარტიის „უდარ“-ის თავმჯდომარეობა შესთავაზა საქართველოს ყოფილ პრეზიდენტს, ოდესის საოლქო ადმინისტრაციის ყოფილ ხელმძღვანელს, მიხეილ სააკაშვილს.
კლიჩკომ ფეისბუქით გაავრცელა ვიდეომიმართვა, რომელშიც ამბობს, რომ პარტია „უდარ“-ი მონაწილეობას მიიღებს 21 ივლისის ვადამდელ საპარლამენტო არჩევნებში და პარტნიორებს გაერთიანებას სთავაზობს.
„მე ვრჩები პარტიის ლიდერად, მიხეილ სააკაშვილს კი ვთავაზობ გახდეს პარტიის თავმჯდომარე“ – განაცხადა ვიტალი კლიჩკომ.
უკრაინული მედიასაშუალებები აღნიშნავენ, რომ კანონის თანახმად, მიხეილ სააკაშვილს შეუძლია პოლიტიკური გაერთიანების თავმჯდომარეობა, მაგრამ არ შეუძლია საპარლამენტო არჩევნებში კენჭისყრა, რადგან ბოლო წლებში უკრაინაში არ უცხოვრია.
წყარო: “რადიო თავისუფლება”