ლაშა ჟვანია საქართველოს პრეზიდენტის ადმინისტრაციას ტოვებს

ჩემთვის არ აქვს მნიშვნელობა საიდან ვემსახურები ჩემს ქვეყანას, მაგრამ სჯობს იქედან, სადაც საკუთარი თავი ჯერ არ ამომიწურავს. მარტში მივმართე ჩემს რჩეულ პრეზიდენტს და მთავარსარდალს – მისი შეხედულებისამებრ, მისთვის ხელსაყრელ დროს გამათავისუფლოს პრეზიდენტის ადმინისტრაციის უფროსის თანამდებობიდან. პრეზიდენტისთვის ხელსაყრელი დრო 1 მაისია.
ჩემს მეგობრებს კარგად გახსოვთ, რომ პრეზიდენტმა მიმართა კათოლიკოს-პატრიარქს, რომ მე გადავსულიყავი პრეზიდენტის ადმინისტრაციაში. ამ წერილს დავურთე ჩემი “განცხადებისმაგიერი” ღია მიმართვა სრულიად საქართველოს კათოლიკოს-პატრიარქისადმი.
მისმა უწმიდესობამ დააკმაყოფილა პრეზიდენტის მიმართვა – გადავსულიყავი ადმინისტრაციაში, მაგრამ არ დააკმაყოფილა ჩემი განცხადება პატრიარქის ფონდიდან გათავისუფლების შესახებ.
ახლა, პირველი მაისიდან მე ვტოვებ პრეზიდენტის ადმინისტრაციას და ვაგრძელებ მუშაობას ჩემს ტკბილ და ბრძენ პატრიარქთან.
ახალი დავალებაც გვაქვს – ფონდი ორიენტირებული იქნება რეგიონებში, საპატრიარქოს მონასტრებთან მეწარმეობის განვითარებაზე, ახალგაზრდების ჩართულობაზე, სწავლებაზე, მომზადებასა და ხელშეწყობაზე. კონკრეტულ პროგრამას წარვუდგენთ ფონდის მმართველ საბჭოს.

მადლობელი ვარ საქართველოს პრეზიდენტის ამ მაღალი და დიდი პასუხისმგებლობის მონდობისთვის. როგორც ადრე, არც მომავალში, ჩემი ეკლესიის ტკბილ მეთაურთან მუშაობის დროს, დავიშურებ ჩემს სიყვარულით სავსე, მართალ სიტყვას და თავდადებას ჩემი სახელმწიფოს მეთაურის მიმართ.

დიდი სოლომონ ბრძენის, ღვთისგან თავმდაბლად თხოვნის შედეგად მიღებულ გონიერ გულს გისურვებთ ყოველ გადაწყვეტილებასა და ქმედებაში მრავალგზის ცილწამებულო, მაგრამ ქვეყნისთვის ყველა დაბრკოლებაზე მაღლა მდგომო პრეზიდენტო, რათა გაარჩიოთ კეთილი და ბოროტი, მართალი და ტყუილი და თქვენი სახელმწიფოს მეთაურობით, ოთხი დღის უიმედოდ დატირებული ლაზარესავით აღდგეს საქართველოს დიდება და ჩვენი საზოგადოების თითოულმა წევრმა იგრძნოს სიკეთე პირველი ქალი პრეზიდენტის მეთაურობის, რათა ისრაელის კიდევ ერთი წმიდა დიდი მეფე დავითის დარად ერთსულვნად, თქვენი თაოსნობით გვეთქვას – “უფალი მეფობს”!

ეს ფოტო კი დარჩება ისტორიას, მასზე მე არ ვჩანვარ, მაგრამ იქ ვიჯექი… პრეზიდენტის მხარეს, მარცხნივ… მომავალშიც იქნება ასეთი ფოტოები, მე იქაც არ გამოვჩნდები, მაგრამ, მიგულისხმეთ, იქ ვიჯდები… ოღონდ მარჯვნივ, პატრიარქის მხარეს… რა მნიშვნელობა აქვს… შუაში კვლავ ძელი ცხოველი, საქართველოსავით გოლგოთაგამოვლილი ჯვარი, ებრაელი სიდონია, ღვთის წინაშე შიშით, პატივისცემით და ძრწოლით მდგარი ქართველი ხელისუფალნი, დედა ღვთისმშობელი და საქართველოში გაბრწყინებული თავდადებული ადამიანები არიან თავმოყრილი…

4 დღის მკვდარი ლაზარეს აღდგინების დღეს გილოცავთ, ჩემო მეგობრებო. ბზობის “ოსანას და დიდების” შემდეგ ყოველთვის გოლგოთაა, რასაც უპირობოდ, აღდგომა და ამაღლება ახლავს!”, – წერს ჟვანია.