მატარებლების მწარმოებელ შვეიცარულ კომპანია „შტადლერის” წარმომადგენლებს თბილისის ვიცე-მერი ირაკლი ხმალაძე, თბილისის სატრანსპორტო კომპანიის დირექტორ მამუკა კობახიძესთან ერთად შეხვდა.
„რამდენიმე თვის წინ, თბილისის მერიამ კომპანია „შტადლერთან” მემორანდუმი გააფორმა, რომლის ფარგლებშიც, საქართველოში „შტადლერის” წარმოება განიხილება. ეს არის კომპანია, რომელიც სარკინიგზო ტრანსპორტს აწარმოებს. დღეს კომპანიის ხელმძღვანელებთან და დამფუძნებლებთან პირველი სამუშაო შეხვედრა შედგა, სადაც მემორანდუმის ფარგლებში, თანამშრომლობის შემდეგი დეტალები განვიხილეთ. იმ შემთხვევაში, თუ თბილისის მერიასა და „შტალდერს” შორის რამდენიმე მნიშვნელოვან საკითხზე შეთანხმება მოხერხდება, წლის ბოლოს, შესაძლებელია, თანამშრომლობის ხელშეკრულება გაფორმდეს. აღნიშნული ხელშეკრულების ფარგლებში, საქართველოში სარკინიგზო ტრანსპორტის დამამზადებელი ქარხანა აშენდება, რომლის მფლობელი და განმახორციელებელიც, შვეიცარული კომპანია „შტადლერი” იქნება”, – განაცხადა ირაკლი ხმალაძემ.
შეგახსენებთ, რომ „შტადლერი” სარკინიგზო ტრანსპორტის წარმოებაში მსოფლიოს ერთ-ერთ ლიდერ კომპანიას წარმოადგენს და საქართველოში ადგილობრივი ხელისუფლების, „საქართველოს რკინიგზისა” და თბილისის მერიის მხარდაჭერით, რკინიგზის ტრანსპორტის რეგიონული საწარმოს აშენებას გეგმავს.
შვეიცარული კომპანია, როგორც რკინიგზის სამგზავრო მატარებლებს, ასევე, მეტროსა და ტრამვაის შემადგენლობებს აწარმოებს და მას მსოფლიო მასშტაბით, სხვადასხვა სიმძლავრის საწარმოები გააჩნია. საქართველოში წარმოებული პროდუქცია, როგორც ლოკალური, ასევე, რეგიონული ბაზრისთვის იქნება განკუთვნილი.