ნოვოროსიისკში მცხოვრებმა წყვილმა, ნადეჟდა აპაჩკინამ და მიხაილ ალავერდიანმა, ხუთი დღე გაატარა ღია ზღვაში, საკვებისა და წყლის გარეშე. ამის შესახებ ინფორმაციას რუსული მედია ავრცელებს.
როგორც წყვილი იხსენებს, ისინი 8 აგვისტოს მცირე ხნით სათევზაოდ გავიდნენ ზღვაში გასაბერი ნავით. წყვილი უკან დაბრუნებას მალევე აპირებდა, ტელეფონები და საათები მანქანაში დატოვეს, თან ჰქონდათ მხოლოდ ერთი შეკვრა მზესუმზირა, საქორწინო ბეჭდები და თევზის სატყუარა. მათ ერთი ნიჩაბი ზღვაში დაეკარგათ, რის შემდეგაც გასაბერი ნავი დინებამ გაიტაცა და წყვილი ნაპირიდან შორს აღმოჩნდა.
მიუხედავად იმისა, რომ წყვილი დახმარებას ითხოვდა, ახლომახლო ჩავლილმა ტანკერებმა და ტურისტულ კატერებზე მყოფებმა გასაბერი ნავი ვერ შენიშნეს და რომ არა ბერძნული გემის ეკიპაჟი, რომელმაც წყვილი ღია ზღვაში შენიშნა, შესაძლოა ისინი ცოცხალი ვერ გადარჩენილიყვნენ. ბერძნული გემი თურქეთიდან შავი ზღვის გავლით ტამანის პორტისკენ მიცურავდა. თავიდან წყვილი გემის კაპიტანმა, ხრისტოს კონსტანტინიდისმა შენიშნა. ამ დროს დაკარგულები ნაპირიდან 70 კილომეტრის დაშორებით იყვნენ.
წყვილმა ზღვაში მზისგან ძლიერი დამწვრობა მიიღო, შიმშილი და წყურვილი, საშველად მოსული ბერძნული გემი თავიდან მათ ჰალუცინაცია ეგონათ. ეკიპაჟი წყვილს სამი დღე უვლიდა და მხოლოდ მას შემდეგ დააბრუნეს ისინი ნაპირზე, როცა დარწმუნდნენ, რომ უკეთ იყვნენ.